Karon na lang

Dear Noy Kulas,

Maayong adlaw nimo. Nagpada ko nimo sa akong problema parte sa akong anak. Ako siyang anak sa dalaga pa ko. Ang amahan aning akong anak nga lalake wa manginlabot sa akong anak. Bisan peso, wa siya maka- contribute sa pagpadako aning bataa.

Karon nga dako na ang among anak, nagpakita na siya. Nakigsuod na siya nga wa ko makahibawo kon wa pa mo post ang classmate sa akong anak sa Facebook. Gisakitan ko kay wa siyay batasan kay unta, husto pa siya, nananghid siya nako.

Wa nako gi confront ang akong anak kay di ko gusto siya maangin sa akong kasuko. Noy, unsa may akong buhaton aron mabadlong ning tawhana? Husto bang ako siyang pugngan nga moduol sa among anak. Maayo kaha ni, Noy. EDA Ed,

Sakit bitaw na nga karon na lang nga daku na ang bata, diha na siya nisulod. Maora bag wa siya magtanom ug mag-atiman unya karon nga dako na, mopahimulos na siya. Kana kon kana nga aspeto ang imong pagatan-awon.

Apan sa pikas bahin, bisan unsaon siya ang amahan. Kalipay sa imong anak nga maila ila niya ang iyang amahan kay way bata nga wa magkinahanglan og pagmahal sa usa ka amahan. Busa, ingon niana ang iyang gibati nga kalipay.

Pakig-estoryahe ang imong ex apan pananghid sa imong bana. Bisan wa ka mosulti nga minyo ka na,but in between maklaro nga naa na kay bana. Pananghid aron di siya malain. Ipahungaw ang imong mga kahiubos ug kasuko ngadto sa imong ex aron makagawas kon unsa man ang imong gibati. At least makahibawo siya unsa ang kasakit nga imong naagian.

Sa ako nang giingon, ihatag sa imong anak ang unsa may iyang ikalipay. Busa, human mog sulti sa imong ex diha ra kutob. Ayaw ihikaw ang unsa may ikalipay sa imong anak tungod kay mao na ang importante isip ginikanan. Kon unsa may wa mahatag sa amahan sa iyang anak, higayon na kini nga iyang matapakan ang kahaw-ang ug kakuwang.

(Alang sa imong problema, e-mail sa kulassuper@sunstar.com.ph ug rojval69@ yahoo,com)