Villarante giabsuwelto sa Ombud

Kanhi Bise Mayor Romeo Villarante ug mga kanhi sakop sa konseho gipakaway-sala sa Ombudsman Visayas sa kasong kriminal ug administratiba nga gipasaka ni kanhi Talisay City Administrator John Yre Delos Reyes, anak ni kanhi Mayor Johnny Delos Reyes.

Ang kaso ni Delos Reyes nagsugod human nga ang mga sakop sa konseho nideklarar niini nga persona non-grata niadtong Febrero 2, 2016 atol sa ilang regular session.

Samtang laing resulosyon nga gipalabang sa konseho nga nag-awhag sa buhatan sa Civil Service Commission 7 ug sa Department of Interior and Local Government nga mohimo og imbestigasyon labot sa giingong imoral nga binuhatan ni Yre nga matod pa adunay kabit nga iyang kanhi empleyado sa iyang buhatan.

Kini ang hinungdan nga si Yre nipasaka og reklamo sa Ombudsman ug nihulagway nila ni Villarante, kanhi konsehal Danilo Caballero, Edward Alesna, Aldin Diaz ug incumbent city councilors Doroteo Emit, Antonio Bacaltos Jr. ug pangulo sa Association of Barangay Councils (ABC) Raul Cabañero nga niabuso sa ilang gahum.

Matod ni Yre nagpakauwaw kini kaniya ug naghatag og dili maayong reputasyon sa iyang pagkatawo ug isip city administrator kaniadto.

Iyang gihulagway ang maong mga resolusyon nga usa ka politically motivated ilabi na kay ang maong mga tawo anaa sa oposisyon.

Apan sa tubag sa mga sinumbong, matod nila, nga igo lang silang nihimo sa ilang trabaho pinasubay sa balaod.

Sa duha nila ka resolusyon, ilang gibase sa taho nga bisan pa og minyo si Yre aduna gihapon kini hinigugma nga laing babaye samtang sa programa usab sa radio diin siya ang nagdumala isip block timer adunay kini malicious ug libelous nga komentaryo batok kanilang mga konsehal

Sa tubag ni Villarante isip maoy presiding officer ug sa pito ka mga konsehal, ilang gihimakak ang tanang pasangil ni Yre.

Giklaro ni Villarante nga igo lang siyang nidumala sa session ug wala siyay labot sa pagpalabang sa resulosyon apan mahimo lang siyang makabotar kon adunay tie.

Iyang gidugang nga si Yre mas malipay pa gani sa ilang gihimo sa konseho aron mahatagan siyag kahigayonan nga malimpyohan ang iyang pangan sa pasangil.

Samtang, labot sa giingong aduna kini kabit, ang ilang tumong mao lang ang pagsiguro nga si Yre dili moabuso sa iyang gahum isip administrator ug dili gamiton ang iyang posisyon sa iyang personal nga katuyoan.

Si Caballero sa iyang counter affidavit, miingon nga iyang gipalabang ang resulosyon nga nag-awhag sa CSC ug DILG nga mohimog pakisusi human nga ang drayber sa city hall gihimo nang drayber sa iyang kabit. Sa ilang pagpadeklarar nga

persona non-grata, kini ilang gibase sa pulos way basehanan nga pagpakauwaw ug pagguba sa ilang pangan diha sa iyang programa sa radio.

Apan sa desisyon sa Ombudsman Visayas nga gipirmahan usab ni Ombudsman Carmencita Carpio Morales, gibasura ang maong reklamo ni Yre tungod kay walay nakitang igong basehanan sa iyang pasangil nga grave misconduct and oppression ug way nakita nga igong kapasikaran nga sila nakalapas sa Section 3 sa Republic Act 3019.

Si Villarante nihangop sa maong desisyon ug niingon nga nagpakita lang kini nga sila sa konseho diin siya ang nidumala, wala moabuso ug insakto lang ang ilang gihimo pinasubay sa balaod.