USC Law lig-ong team sa Oxford Law moot court
Nitapos nga lig-on ang University of San Carlos (USC) School of Law and Governance sa bag-ohay pa lang nga Price Media Law Moot Court Competition didto sa University of Oxford sa Englatera.
Unang higayon nga nisalmot ang USC Law sa gibantog na nga moot court event sa kalibutanong legal community nga namugna pagka-2008 aron mapalambo ang interes sa international law nga may labot sa kagawasan sa pagpamahayag.
Apan ang mga koponan sa USC Law nagmalampusong nagbansiwag sa uban sa’ng mga international moot court competitions sa milabay nga pipila lang ka tuig.
Dul-an sa 400 ka mga grupo gikan sa tibuok kalibutan ug 44 ka mga finalist sa mga international rounds nangadto gyud sa Englatera alang sa indigay nga mipasidungog kang Prof. Monroe E. Price nga tinamod sa University of Oxford.
Gilangkiban ang USC team nilang Vincent Joseph Cesista, Jonah Mark Avila, Tess Marie Tan, Rashid Pandi ug Stephanie Olea.
Naka-atbang mismo niini ang koponan sa University of Oxford sa semi-finals ug mitugyan sa host team sa hiktin lang nga kalainan, matod ni USC Law dean Joan Largo.
Naka-atbang ug nabuntog nila ang mga taga Cardozo School of Law sa New York, USA, University of Notre Dame sa Indiana, USA, National University of Singapore, ug National University of Kiev - Mohyla Academy of Ukraine.
Mihuman nga ilatulo ang USC Law sa maong indigay kansang mga tigpasiudga mingalan nilang Cesista ug Olea nga ika-6 ug ika-8 nga mga best oralists.
Nakapakugang ang USC School of Law and Governance sa international law community tungod sa mga nagkalainlain niining mga kalampusan.
Nitumaw kini nga “Best New Team” sa 2015 Philip C. Jessup International Law Moot Court competition sa Washington D.C.; ug nakampyon sa 2016 Stetson International Environmental Law Moot Court Competition sa Florida, USA.