Pacquiao-Horn rematch sa Nov. 12 mahinayon?
Mismong si Manny Pacquiao na ang mihatag og katin-awan nga madayon ang ilang rematch ni Australian Jeff Horn karong Nobiyembre 12, sukwahi sa mga taho nga naggawas sa nangaging pipila ka mga adlaw.
Nagkanayon ang Pambansang Kamao sa Pilipinas nga madayon ang away ug ang kinahanglan na lang ihanay
mao ang venue. “Sa ngayon, pinag-uusapan pa kung saan. Hindi matutuloy ang Australia pero dinadala natin dito sa Pilipinas. Pinag-uusapan na sana dito sa atin ang rematch,” matod ni Pacquiao sa interbyu sa DzBB.
Sa sayong taho sa Agence Fance-Presse, giingon nga miatras si Pacquiao sa away gumikan kay aduna kini obligasyon nga kinahanglang tumanon sa ulahing bahin ning tuiga isip senador sa Pilipinas.
Matod nga kasamtangang nangita og laing kontra si Horn, kinsa miilog sa World Boxing Organization (WBO) welterweight title niadtong Hulyo 2 sa SunCorp Stadium sa Brisbane, Australia.
“We have been advised today that Manny Pacquiao... cannot return to the ring on 12 November as proposed,” matod pa ni Queensland Premier Annastacia Palaszczuk. “I am advised Mr. Pacquiao, who is also a Senator of the Philippines, will have other commitments at that time.”
Apan kagahapon, giklaro ni Pacquiao ang tanan kabahin sa rematch.
Sa pangutana kon kaya ba sa Pilipinas ang kadako sa gikinahanglang pundo aron mapahigayon ang away, si Pacquiao miingon: “Hindi bale, marami naman and sumusuporta. Ang Department of Tourism susuporta at ang ating Pangulo nakasuporta.”
“Maganda sa ating turismo kung dito ang laban. Tuloy ang laban ang pinag-uusapan na lamang ay kung saan.” dugang sa kanhi 8-division world champion.