CESAFI MIBALIKTAD SA ILANGDESISYON
Mga duwa karon 1:00 pm- SWU vs. USPF ( jrs) 2:30 pm- CITU vs.DBTC ( jrs) 4:00 pm- USC vs USJR ( jrs) 5:30 pm UV vs USPF (srs) Human sa imbestigasyon nga gipangulohan ni Cebu Schools Athletic Foundation Inc. (Cesafi) deputy commissioner lawyer Marven Pañares kagahapon, nadesisyunan sa liga nga bakwion ang pagdeklarar niini og ‘bench clearing” atol sa duwa University of Southern Philippines Foundation (USPF) Panthers ug University of Cebu (UC) Webmasters sa college division niadtong Huwebes sa Cebu Coliseum.
Sa nahabiling 1:17 minutos ning maong duwa diin mingdomainar ang Webmasters, 81-55, miulbo ang karambola dihang diriyot maigo sa bola ang referee nga si Rolando Yamelo gikan sipyat nga pasa ni USPF guard Clyde Avancena ngadto sa iyang kauban nga si Mark Tenebroso.
Si Yamelo miduol dayon kang Avancena ug giingong mibahad nga iyang “sumbagon” si Avancena kon makit-an niya sa gawas sa venue.
Gilabanan si Avancena sa iyang kauban nga si Roy Quiachon ug daw sa usa lang ka pamilok, misamot ang kagubot ug mingsulod na sa korte ang ubang mga magduduwa sa Panthers.
Human niini, ang laing deputy commissioner nga si Danny Duran mideklarar og “bench clearing” ug mipaundang sa duwa.
Sa imbestigasyon kagahapon, giangkon ni Duran nga sayop ang pagtawag niya og “bench clearing” ug iya lang kining gihimo aron dili mosamot ang kasamok.
Gipasabot ni Duran nga daghan pa’ng mas grabe ang puwedeng mahitabo sa nahabiling 1:17 minutos hinungdan nga iyang gipaundang ang duwa pinaagi sa pagtawag og bench clearing.
Hinuon upat ka mga magduduwa sa Panthers ang wala nakalikay sa silot. Kini mao sila si Kenneth Cada, Edwin Villarta, Jhmer Ranceli ug Ranje Mangayo, kinsa pulos gipahamtangan og usa ka duwa nga suspensyon gumikan sa ilang pagsulod sa korte.
Mao sab nga salaod ang nadawat sa duha ka mga sakop sa coaching staff sa Panthers.
Sa laing bahin, si Yamelo ug ang kauban niyang mga
referee niadtong duwaa nga sila si Melvin Caumeran ug Jebrel Calma dili pa maka- officiate samtang dili pa mahuman ang laing imbestigasyon nga buhaton sa liga kabahin sa nahitabo.
Ang mga silot nga nadawat sa Panthers moepekto sa ilang pagpakigbatok sa
defending champion University of the Visayas (UV) Green Lancers sa main game karong gabii.
Sa high school division, magabot sa premirong duwa ang Southwestern University (SWU) Baby Cobras batok USPF Baby Panthers unya mosunod ang engkuwentro sa Don Bosco Technological Center (DBTC) Greywolves batok Cebu Institute of Technology University (CITU) Wildcats ug University of San Carlos (USC) Baby Warriors batok University of San Jose Recoletos (USJR) Baby Jaguars.