MUSLIM LEADERS NAKIG-ALAYON SA TALISAY POLICE
Kapulisan ug Muslim leaders sa dakbayan sa Talisay nagkasinabot alang sa pagpakigbatok sa tanang matang sa kriminalidad ilabi na sa ilegal nga drugas.
Gumikan niini, ang mga lider sa mga Muslim nga nakabase sa Talisay nipirma'g usa ka kasabotan nga nagpaluyo sa kapulisan.
Si PO3 Christopher Cesa, Public Information Officer sa Talisay Police Station, niingon nga nihimo karon silag mga kalihukan sama sa pagpakiglambigit sa mga Muslim
community nga nagpuyo sa ilang siyudad.
Matod niya nga ila kining gihimo tungod kay bag-o usab ang ilang hepe sa kapulisan nga si Supt. Jason Villamater.
Iyang gipasabot nga ang una nilang katuyoan mao ang pagpakigtagbo sa mga lider sa mga Muslim diha sa Talisay aron hangyuon nga kon aduna silay mamatikdan nga bag-ong Muslim nga moabot ug lahi ang linihukan i- report gilayon ngadto kanila.
Kini may kalabotan sa laing hugna sa ASEAN Summit Meeting nga gipahigayon didto sa lalawigan sa Bohol sanglit dili sila gusto nga masubli ang nahitabo kaniadto nga adunay mga sakop sa Abu Sayaff nga nakasulod sa Bohol.
Ikaduha nilang katuyoan mao ang pag-awhag nga paluyohan sila sa ilang kampanya batok sa ilegal nga drugas.
Si Abdul Malik, lider sa mga Muslim community, niingon nga sa pagkakaron wala pa silay namatikdan ug wala usab silay mga igsuong Muslim nga tigpayuhot og drugas.
Samtang, si Alawe Abdul Halim, lider sa ilang simbahan, nibutyag nga kon aduna silay mahibaw-an nga adunay miabot nga igsuon nilang Muslim ila kining klaruhon kon unsay ilang katuyoan.
Apan kon makabantay sila nga dili maayo ila kining hangyuon sa pagpauli nalang ug kon magmagahi diha pa nila i- report ngadto sa Talisay Police.