Construction worker nadat-ugan sa compressor, patay; kompaniya moabag

Namatay ang usa ka construction worker human nadat-ugan sa pag-alsa og air compressor sa nagpadayong pagtukod sa Terminal 2 sa Mactan- Cebu International Airport (MCIA) niadtong Biyernes sa hapon.

Matod ni Cyril Ticao, OIC Regional Director sa Department of Labor and Employment (DOLE) 7 nga ang biktima giila nga si Adolfo Flores, 36, usa ka panday sa RCK Builders.

Sumala pa ni Ticao nga kini nahitabo mga alas 4:30 sa hapon niadtong Biyernes.

Giingong naangol si Flores sa dihang gialsa niini ang air compressor nga may gibugaton nga 750 kilos.

Base sa text message ni Engr. Russel Cañete, safety officer sa MCIA ngadto ni Ticao, nga human sa insidente daling gidala sa Mactan Doctor’s Hospital ang biktima apan sa samang adlaw nakabsan sa iyang kinabuhi si Flores sud sa maong tambalanan.

Sa pagkutlo ning balita, gihuwat pa ni Ticao ang resulta sa imbestigasyon sa Labor Laws Compliance Officer sa DOLE 7 nga nisusi sa construction site kagahapon sa buntag.

Matod ni Ticao nga di pa siya maka-desider kon moisyu sila og stoppage order sa kasamtangang pagtrabaho bag-ong terminal sa MCIA.

Samtang ang RCK Builders nga subcontractor sa Terminal 2 nisaad nga moabag sa banay ni Flores.

Ilang gihulagway si Flores nga usa ka mahinungdanong trabahante.

Si Jason Torres, kinsa coordinator sa proyekto, niingon nga ang RCK ni contact na sa pamilyang Flores.

Nakiglambigit na usab ang RCK Builders sa mga ahensya sa kagamhanan aron magsusi sa hitabo ug mopatuman og tukmang mga lakang aron di na masubli ang hitabo.

Matod ni Torres nga ang RCK nagpatuman sa labing taas nga safety standards. / dugang taho sa Sunstar Cebu