Osmeña gisaway nga way nahimo sa baha; mayor mipasigarbo sa ‘sardinas’

Gisaway ni Konsehal Joel Garganera ang administrasyon ni Mayor Tomas Osmeña sanglit hangtod karon wa mahatagi og prayoridad ang solusyon sa grabeng baha nga masinati sa dakbayan matag kusog nga bunok sa uwan.

Ang Cebu City, lakip na ang mga kanait nga dapit, nakasinati og grabeng baha sa nakalabay nga mga adlaw nga niresulta sa grabeng kahuot sa dagan sa mga sakyanan ug ang uban napagngan gumikan sa kalawom sa tubig.

Si Osmeña, sa iyang bahin, nagkanayon nga ila nang gisugdan ang ilang mga lakang aron mahatagan og solusyon ang maong problema nga naglakip sa “Basura Mo, Sardinas Ko.”

Ang maong programa gilusad ni Osmeña sayo ning tuiga aron pagdasig sa mga tawo nga mohipos sa ilang mga basura aron di na ipataka og labay nga maoy hinungdan sa pagkabara sa drainage.

Matod pa sa mayor nga sa mosunod nga usa ka tuig, mabatyagan na ang epekto sa solusyon nga iyang nahunahunaan sama sa pag-construct og mga maayong kanal para sa drainage.

Apan gipadayag ni Garganera nga wa niya makita ang epekto sa Basura Mo, Sardinas Ko sanglit daghan gihapon nga basura nga nagtipun-og sa drainage ug bisan gani daplin sa karsada, kansang pagkolekta sa basura iyang gihulagway nga walay klaro.

Samtang giduso karon ni Konsehal Jerry Guardo nga sa higayon nga makasinati og grabeng uwan ang siyudad, ang City Government maoy mopasakay sa mga pasahero nga natanggong ug kadtong nangita og kasakyan.

Ang maong ideya iya nang gipaabot ni Osmeña ug way pagbabag ang mayor.