Nagbitay sa Hangin

Binasi sa Isaias 55:6-9; Salmo 145; Taga Filipo 1:2024, 27; ug Mateo 20:1-16

Lisod nga dili mapahingangha ang tawo atubangan sa mga monasteryo sa lugar sa Greece nga gitawag og Meteora nga kon hubaron sa pinulongang Griyego "nagbitay". Unom kini nga puyanan ug balay-alampuanan ang mga monghe, babaye ug laki, nga morag nagbitay sa hangin kay gitukod sila sa tuktok sa bungtod nga ang labing habog may gitas-on og 600 metro ug ang gilapdon lima ka hektarya.

Sa ato pa, morag mga tambok nga tore ang maong mga bungtod ug pangpang na ang mga kilid niini!

Gisugdan kini pagtukod sa siglo 16 sa mga ermitanyo nga nipuyo sa mga langob nga nahulma sa kilid sa maong mga bungtod. Hinayhinay nilang gisaka ang tumoy sa mga bungtod. Pag-abot nila didto nagtukod usa sila og makina nga may pisi nga maoy mobira sa mga galamiton sa pagtukod og gambalay. Human niini pagasugdan dayon nila og tukod gikan sa kilid sa pangpang ngadto sa tungatunga niini.

Ang resulta mga monasteryo nga daw milagrosong nagbitay sa hangin! Saksi kini sa lalom nga Kristohanong pagtuo sa mga monghe nga nagpadayon og dasig sa pagtuo sa mga moduaw niini.

Diha sa ebanghelyo ni Mateo mabasa nato ang pagbudlay sa lima ka pundok sa mga trabahante sa parasan. Ang mitrabaho sugod sa kadlawon nagbagulbol batok sa tag-iya sa parasan kay ang suweldo nga gihatag niya ngadto sa mitrabaho sulod lamang sa usa ka oras susama ra sa ilang nadawat. Nasina sila bisag ang ilang nadawat maoy ilang gikasabutan.

Dili nila matugkad ang hunahuna sa Dios, sa iyang pagkamanggihatagon ug pagkamaluloy-on. Sa pulong pa ni propeta Isaias, kon unsa kalayo ang kalangitan sa kalibutan, ingon usab kataas ang Diosnong pamaagi sa tawhanon. Buot man god natong mga tawo nga pugngan ang Diosnong kaluoy.

Ang misugod pagtukod sa mga makapahingangha nga monasteryo sa Meteora dili makaingon nga ang ilang pagbudlay lamang ang angay gantihan. Ang nagpadayon sa ilang gisugdan dako usab ang nahatag. Sa ato pa, way rason kon nganong masina.

Diha pod sa atong bulohaton sa pagsabwag sa maayong balita adunay nag-una, adunay misunod, ug adunay ulahi. Lainlain ang hagit nga giatubang sa matag trabahante sa parasan sa Dios diha sa ilang nagkandaiyang panahon. Kitang tanan adunay ikatampo sa kalamboan sa Simbahan ug sa misyon niini sa pagsabwag.

Ang importante mao nga ang atong kinaiya subay sa gisulat ni San Pablo ngadto sa mga taga Filipo: "Alang kanako kinabuhi si Cristo, ug bintaha ang kamatayon." Sa ato pa, bisan unsay mahitabo ang mahinungdanon mao nga subay kini sa ebanghelyo ni Cristo, dugang pa ni Pablo.

Nindot kaayo ang mga monasteryo sa Meteora. Simbolo kini sa ikatampo sa tawo sa pagpangandam sa pag-abot sa gingharian sa Dios.