Piolo-Toni movie sure winner na
Human sa tulo ka tuig makita na nato og balik sa big screen ang box-office tandem nilang Piolo Pascual ug Toni Gonzaga.
Ang "Last night" isalida sa inyong mga paboritong sinehan karong Miyerkules Septyembre 27. Nakasiguro ko nga daghan ang maglinya sa paglukat og ticket.
Gawas sa mga panatiko nilang Piolo ug Toni, daghan ang kuryoso kon unsa ang istorya nga gitawag nilag dark rom-com movie.
Sa trailer pa lang, makutaw na imong hunahuna kon unsay nahitabo sa kinabuhi nilang Mark (Piolo) ug Carmina (Toni) nga daw nagkaila sa pagtabang sa tawo nga nahagbong sa LRT, unya nagspend time together bisan pa og may mga karelasyon na sila. Unya kalit lang sa ending sa trailer buot nilang maghikog.
Grabe kinsa may dili maintriga ani kon unsay dangatan ug padulngan sa ilang love story, kini pa lang gusto na nimong mag-una sa sinehan sa sobrang excited.
Gawas nga Piolo Pascual ug Toni Gonzaga ang bida, sa direksyon ni Joyce Bernal sa Star Cinema ug Spring films sinuwat pa ni Bela Padilla mao nga sigurado nang winner sa takilya, ay'g saba!
Daghan man sab diay ang nagsunod aning Devon Seron, ang 4th placer sa PBB nga gikan Cebu, ug kaubang housemate ni Ryan Bang ug James Reid, ang grand winner.
Tiaw mo bay bisan asa ko dapita daghan ang nangutana bahin sa dalaga morag nabitin sila sa akong tsika sa miaging semana. Malipayon sila sa career karon ni Devon ug siguradong natagbaw ang mga fans kay nag-mall show man kini kagahapon dinhi sa Cebu uban ang iyang mga Koreanong leadingman sa "You with me".
Way kabutangan sa kalipay ang babaye kay siya ang bida sa Korean movie nga "You with me." Magtiayong pinoy ang nagpaluyo niini ug pinoy usab ang direktor.
Suportado sa gobyerno sa Korea ang proyekto ug makatrabaho niya dinhi ang staff ug crew nga naghatud nato sa sikat nga Korean series nga "Goblin".
Nagpaputol og buhok, nagpa-blond ug nagkat-on sa lenguaheng Koreano para swak sab kini sa iyang mga katandem nga duha ka korean star Hyun Woo ug Jin Ju Hyeong nga mga bida usab sa Korean series nga "Hwarang". Karon pa lang, excited na ang Devon sa pelikula nga hapit na makita sa mga sinehan, ay'g saba!