MIPAAMBIT OG GRASYA SA IYANG BIRTHDAY
Gawas sa party, ang uban mosaulog sa ilang birthday pinaagi sa pagpaambit sa mga grasya nga nadawat ngadto sa uban.
Sama sa gibuhat ni Jose Emery “Joy” Roble, presidente ug
chief executive officer sa Roble Shipping Inc., nga nisaulog sa ika 48 nga kasumaran sa iyang adlaw nga natawhan niadtong Septiyembre 18, 2017 sa nilahi nga paagi.
“Ato ning gihimo sa mga grasya ug fruitful years nato,” matod niya.
Pagka buntag sa maong adlaw, siya ug iyang batchmates, nanghatag og 5,300 ka food
packs sa mga tinun-an sa Abellana National School, dakbayan sa Sugbo. Sa maong tunghaan sila nigradwar niadtong 1986.
Gikan sa ANS, sila nitabok sa Robinsons Galleria Cebu diin si Roble nangu sa bloodletting activity. Ang kalihokan gisalmotan sa iyang batchmates, mga empleyado ug apprentice sa ilang shipping company ingon man mga tinun-an sa mga kursong Maritime sa University of Cebu ug University of the Visayas.
Siya nipasiugda pagdonar og dugo agi og pagpasalamat human siya gitudlo ni Presidente Rodrigo Duterte isip miyembro sa board of governors sa Philippine Red Cross (PRC) niadtong Enero 18, 2017.
Moabot sa 161 ka mga tawo ang malampuson nakuhaan og dugo sa kalihokan nga dunay tema: “Give Blood. Save Lives. Bring Joy.”
Paagi usab kini niini pagtabang sa PRC Cebu Chapter nga nanginahanglan og dugo ug pagpaluyo sa mga programa ni Senador Richard Gordon, ang chairman ug chief executive officer sa PRC. “Ang dugo gikinahanglan kaayo. Wa ma- emphasize unsa ka importante ang pag- donate og dugo,” pahayag ni Roble. Siya nipasiugda usab og
fundraising activity diin inay mohatag og regalo ang iyang mga higala, iya kining gidasig nga magtampotampo aron maayudahan ang PRC Hilongos Sub Chapter diin siya ang chairman. Sa kasamtangan, dul-an na sa P400,000 ang natigom nga kwarta ug tinguha nila mopalit og yuta nga maoy tukoran sa buhatan sa PRC sa Hilongos.
Si Roble kanhi mayor sa Hilongos sud sa usa ka termino gikan sa 2010 hangtod sa 2013.
Iyang gitapos ang iyang adlaw, pinaagi sa salosalo kauban ang iyang pamilya, mga higala ug empleyado sa ilang kompaniya. /