DRUG DEN GIDEMOLIS
HUMAN SA SHAME CAMPAIGN SA BARANGAY PAJO, LAPU-LAPU
Balay nga gihimong suyopanan og gidiling druga sa Sityo Camansi, Barangay Pajo, dakbayan sa LapuLapu gipademolis isip kabahin sa agresibo nga kampaniya sa barangay sa pagsumpo sa ilegal drugas, human sa shame campaign.
Wa makabalda ang bunok sa uwan kagahapon sa buntag sa dihang giguba ang estruktura nga kanhi gipanag-iya sa usa ka Portugal Balani nga giingong gigamit nga suyopanan, repacking sa shabu ug ubang illegal nga kalihokan nahimutang sa Sityo Camansi sa maong barangay.
Giklaro ni Barangay Kapitan Junard Chan nga dili barangay initiated ang pagbungkag sa maong balay sanglit ang ig-agaw sa tag-iya nga naila lang sa pangalang ‘Ice Balani’ uban sa kapuyo niini nga si Geraldine maoy nangunay sa pagguba niini.
Gisaysay sa opisyal nga sa nangaging mga buwan gironda sa kapulisan ang maong dapit apan nakaipsot si Portugal Balani pinaagi sa paglayat paingon sa dagat sanglit ang maong estruktura nag-umbaw man sa baybayon sa Mactan Chanel.
Hangtod karon wa pa igkita si Balani biniyaan ang iyang balay nga gipulihan sa pagdumala sa iyang ig-agaw nga si Ice ug ang kapuyo niini.
Si Ice nga nalakip sa talaan sa kapulisan sa mga drug personality ang misurender human sa maong operasyon ug misunod sa pagtahan sa iyang kaugalingon ang live-in partner niadtong Septiyembre 5, human sa shame campaign.
Apan ang mga silingan nagduda nga nagpadayon pa ang illegal nga binuhatan sud sa estruktura kay sa higayon nga moduaw si Ice, dugay kining mogawas.
Matod ni Chan sigun sa pasabot ni Ice nga ang iyang pagduaw sa maong lugar mao lang ang paglawog sa ilang binuhing baboy nga gibilin sa maong dapit.
Nahukman nga aron mawala ang pagduda nga gigamit pa gihapon ang estruktura nga suyopanan, si Ice mismo maoy nangunay sa pagpaguba sa balay inabagan sa barangay. Gawas sa maong demolition namilit sab ang barangay og stickers ngadto sa pipila ka kabalayan sa Sityo Paradise nga adunay natala nga “Likay sa dautan aron dili matanggong sa PRISOHAN” nga adunay contact numbers ni city director PSSupt. Romel Cabagnot, PSI Felix Cleopas, hepe sa Police Station 3 ug Chan.
“Random lang to ang atong pagpamilit (stickers) nga nagpahimangno lang sa publiko,” tipik sa pamahayag ni Chan diin atol sa maong kalihokan miabag ang city police office nga gipangulohan ni Cabagnot.
Apan ipadayon gihapon sa kapitan ang pag- spray sa kabalayan nga positibong giila nga gigamit nga suyopanan.
Andam ang opisyal nga moatubang sa higayon nga mokuwestiyon ang Commission on Human Rights (CHR) sa lain na sab nilang paagi sa pagpatuman sa kampaniya sa illegal drugs.