Kadtong adlaw sa protesta

Linibo ang ningprotesta sa nagkalain-laing dapit sa nasod batok Martial Law niadtong Septiyembre 21 sumad sa pagdeklarar ni Marcos og Martial Law sa Pilipinas.

Milabay na ang 45 ka tuig apan ang baba sa nanagprotesta gisilaban sa kalagot nga nanghimaraot sa balaod militar. Balido kaayo ang ilang mga yawyaw sa pagpanamastamas niini.

Sa mga protestador naglabi ang mga batan-on nga wa makasinati sa kalampingasan sa Martial Law ngadto sa mga tawhanong katungod. Linibo ang nangamatay sa kamot sa mga abusadong military.

Apan sa pagkatinuod ang buhing tumong nila mao si Digong nga ilang gipasanginlan sa naghitak karon nga

‘extrajudicial killings’ ug kini ilang gidudahan nga moproklamar og Martial Law sa nasod.

Nakasabot ko nga ang protesta gisakyan sa taga oposisyon kay diha toy hisgot nga moanha si PNoy ug ubang mga dagko sa Liberal Party. Klaro nga buot nilang itukmod ang pamuno ug kon may higayon sila ang mamuli.

Sa Manjla daghan ang nagprotesta tali sa mga probinsiya. Masabot kay kini ang sentro sa kagamhanan sa Pilipinas. Anhi dinhi lutuon ang paagi pagpalagpot sa Presidente.

Nakita nga didto say proDuterte rally sa Plasa Miranda diin daghan sad ang nanambong. Nagkatibulaag lang pagbundak sa ulan, matod pa sa akong hjgala nga didto

Tin-aw ang gipasabot nga daghan pa ang lunod patay kang Duterte Kon puwersa ang gamiton pagpalagpot kang Digong naa sila nga mobabag. Sa ato pa, mahitabo ang panag-unay nga moulbo ngadto sa civil war.

Mao ni atong pugngan nga di mahitabo. Kay nahigugma ta sa kalinaw. Ang oposisyon may dakong papel sa pagpugong di kay mao hinuoy mohaling sa kalayo aron mosilaob ang kagubot.

Pasagdan lang nato nang mga radical elements kay mao na sila pagtutol bisan kinsa ang Presidente. Kita nga nia sa mainstream di mobuwag sa katarong ug kahusay ning pagpakita sa atong kasagmuyo ning panghitabo karon.