Mamugnaong

Naila si Junard "Ahong" Chan nga mamugnaon sa iyang pagdumala sa Barangay Pajo, dakbayan sa Lapu-Lapu uban sa propesyonal nga mga sakop sa konseho ug bisan ang iyang sekretaryo sa barangay usa ka doktor. Tungod sa kalantip sa liderato sa barangay, dili ikalimod nga moresulta kini sa undanon ug pagpas nga pagpatuman sa bisan unsang programa ug proyekto.

Unang nabaniog ang Pajo bahin sa ilang estilo sa pagsanta sa pagkaykap sa gidiling drugas sa barangay pinaagi sa paglusad sa shame campaign, diin niani kini og mga pagsaway ug daghan usab nga ning-uyon. Sa laktod, nimugna og debate sa publiko. Sa shame campaign, ang balay nga naila nga drug den o suyupanan markahan og pasidaan.

Nag-una sa pagsawsay sa maong pamaagi ang Commission on Human Righs (CHR) nga kini nakalapas sa tawhanong katungod o sama sa gihukman nang daan bisan wala pay hingpit nga kaso o desisyon sa korte nga normal nga proseso sa hustisya ubos sa demokrasya nga kagamhanan.

Ug ning ulahi, ang Pajo nahimo na usab nga kontrobersyal tungod sa pamahayag sa kapitan nga ipademolis ang balay nga nailang suyupanan. Unang nademolis ang usa ka balay sa Sityo Camansi sa Pajo.

Apan giklaro ni Chan nga dili kadto barangay initiated ang pagbungkag sa maong balay sanglit ang ig-agaw sa tag-iya nga naila lang sa pangalang "Ice Balani" uban sa kapuyo niini nga si Geraldine maoy nangunay sa pagguba sa balay.

Gisaysay sa opisyal nga sa nangaging mga buwan gironda sa kapulisan ang maong dapit apan nakaipsot si Portugal Balani pinaagi sa paglayat paingon sa dagat sanglit ang maong estruktura nag-umbaw man sa baybayon sa Mactan Chanel. Si Balani wanted hangtod karon.

Dalaygon ang kaisog ug pagkamamugnaon ni Chan sa pagdumala sa barangay apan, kihananglan molili siya sa pikas bahin aron di mahiagom ang kaugalingon sa ngipon sa balaud.