Ang Antihazing law
Dili na bag-o ang balita nga dunay mga kabataan nga namatay o grabe ang kahimtang tungod sa hazing. Kanunay na kini mahitabo. Apan padayon gihapon ang disgrasya tungod sa hazing. Ngano kaha kini?
○○○ Kaniadtong panahon nga nag- review pa ako para sa BAR exam, usa ka miyembro sa fraternity sa usa ka inilang eskuylahan sa abogasiya sa Makati nagsulti nga panahon sa ilang hazing, apil gyod na sa ilang preparasyon ang pagkontak sa usa ka ospital sa Manila. Segurado gyod na bay nga duna gyoy ma-ICU, matod pa niya. Buot ipasabot, nasayod na silang daan nga panahon sa “initiation rites” o “hazing,” duna gyod mahitabo
nga mamatay o madisgrasya. Di mo mahadlok ana, nangutana ko niya. Mikatawa lang siya dayon sulti nga duna may waiver nga gipirmahan ang mga gusto nga moapil sa ilang frat.
○○○ Nidugang siya pagsulti nga usa sa ilang senior brod mao ang kasamtangan nga Secretary of Justice adtong panahona. Sa akong sabot, gisulti to niya aron pagpasabot nga dili sila angay mahadlok kon dunay daotang mahitabo panahon sa “initiation rites” kay kontrolado sa ilang kauban ang mga opisyal sa gobyerno nga maoy mopasaka sa kaso. Bantog rang wa moy kahadlok ma-ICU inyong mga recruit, ako siyang gisultian. Og igo lang siya sa pagbahakhak dayon lakaw.
○○○ Kasagaran madisgrasya sa “initiation rites” kadtong gusto mosulod unya mosulay sila pag-agwanta sa mga “torture” nga himoon sa mga naghimo sa “hazing.” Og mao kini kasagaran mahitabo panahon sa “initiation rites.” Bunalan sa paa sa usa ka lapad apan solid nga kahoy. Hunahunaa ang bugsay sa mananagat apan mas baga og mas bug-at pa og gamay og mao kana nga klase sa kahoy ang gamiton sa initiation rites. Usahay, ang lapad nga bahin sa kahoy ang modapat sa paa. Kusog mopaka kini kon maigo na.
Usahay sab, ang ngilit sa kahoy ang modapat sa paa. Kon mahitabo kini, kasagaran matumba gyod ang gibunalan tungod sa kasakit niini. Kadaghan kini buhata sa usa ka miyembro sa lain-laing gilay-on. Kon taas ang litra sa fraternity, ingon usab niana kadaghan ang bunal sa usa ka senior brod. Kon daghan ang moatender, daghan sab ang mobunal. Dili katingadnga violet ang kolor sa paa kon mahuman na ang bunal sesyon. Ang di makaagwanta sa bunal, adto gyod deretso sa ospital o sa punerarya.
○○○ Wala pa nay labot sa mga sagpa, kulata og uban pa nga mga pagdagmal aron lang pagmatuod nga kinasing-kasing ang ilang gusto pag-apil sa maong grupo. Duna pay mga “psychological torture” nga ipabuhat sama sa pagpainom sa bisan unsa uban ang pagpatuo nga hugaw kini, paglukso uban sa pagpatuo nga padung sa ubos sa pangpang ang padulngan og daghan pa.