100 KA PRISO ‘GIPAGAWAS’ USA
Dul-an sa usa ka gatos nga mga piniriso sa Mandaue City Jail ang nahatagan sa ilang tempoparyong kagawasan human gipaubos sa programang Enhanced Justice on Wheels (EJOW) sa pagduaw niini sa Mandaue City Regional Trial Court kagahapon.
Karong adlawa, ang EJOW gikatakdang moduaw sa Lapu-Lapu City Hall of Justice ug gikatakdang mohusay sa mga kriminal ug civil nga kaso sa mga piniriso sa city jail. Matod ni court administrator Jose Midas Marquez kinsa vice-chairman sa komitiba sa maong programa nga tuyo sa EJOW nga mapadali ang pagresulbar sa mga kriminal ug civil nga kaso aron mapapas na kini dayon sa sistema sa korte.
“We really visit courts nationwide and ensure that cases are moving. It's very important kase if we're able terminate these criminal and civil cases, these criminal and civil cases will no longer go up to our Court of Appeals (CA) and the Supreme Court (SC), that means they're out of the judicial system already,” ni Marquez sa mga tigbalita.
Kagahapon sa buntag, 66 ka mga piniriso gikan sa Mandaue City Jail, CPDRC, LapuLapu City Jail ang gi- hearing ang mga kaso ubos sa maong programa apan 75 porsyento lang sa gi- hearing ang nadisisyunang gawasnon ang piniriso samtang ang 25 porsyento niini ipaubos pa og review.
Usa sa mga nakabenepisyo sa EJOW mao ang 77 anyos nga si Abraham Bulambao kinsa nabilanggo sa Mandaue City Jail sud na sa 5 ka tuig.
Naserbisyuhan na ni Bulambao ang iyang kaso ug pipila na sab ka pagdungog ang wa tambungi sa reklamante bisan sa abogado niini hinungdan nga daling nadesisyunan nga siya mahatagan ug provisional dismissal.
Matod niya nga self-defense lang ang iyang gihimo sa dihang gisulong siya sa duha ka wa mailhing lalake sa luna nga iyang gibantayan sa Brgy. Pagsabungan niadtong 2012.
Gipaambit ni Marquez nga gikatakdang mopaspas na sab unya ang pagresulbar sa mga kaso sa dakbayan sa LapuLapu ug Mandaue sanglit may lima ka bag-ong huwes ang ibutang sa Mandaue RTC ug upat ka bag-ong huwes ang ibutang sa Lapu-Lapu RTC.