MGA KASO GIBASURA
Gibasura sa Office of the Ombudsman Visayas ang mga kasong kriminal ug administratiba nga gisang-at ni kanhi acting mayor Margot Osmeña batok sa 47 ka mga barangay kapitan nga sakop sa Team Rama.
Base sa desisyon sa anti-graft body nga gipirmahan ni Deputy Ombudsman Paul Elmer Clemente niadtong Septiyembre 4 nga ang mga kasong kriminal sama sa carnapping, malversation of public funds or property, anti-graft and corrupt practices walay igong sukaranan sa pagsang-at sa kaso.
Gibasura usab ang mga kasong administratiba nga gilangkuban sa grave abuse of authority, grave misconduct, gross insubordination ug kalapasan sa Ethical Standard of Public Official and Employees gumikan sa kakuwang sa mga ebedinsya.
Niadtong Mayo 2016, si Osmeña nilingkod isip acting mayor human gisuspenso sa Office of the President silang kanhi mayor Michael Rama, Bise Mayor Edgardo Labella ug 12 ka mga konsehal nga mga sakop sa Bando Osmena Pundok Kausawagan (BOPK) ug Team Rama gumikan sa paghatag sa kanhi mayor og tag P20,000 isip calamity assistance niadtong 2013.
Ang maong kaso gibasura usab sa Ombudsman sa nakalabay nga buwan.
Si Osmeña niisyo og recall oder sa tanang mga propiedad sa Cebu City Government nga naglakip sa mga sakyanan nga giisyu sa City Hall ngadto sa mga barangay labi na ang mga service vehicles nga giisyu ngadto sa mga barangay kapitan nga sagad kaalyado ni Rama.
Ang uban nanguli sa ilang mga sakyanan apan ang 47 ka mga kapitan niuli apan nilapas na sa gipahamtang nga ultimatum ni Osmeña hinungdan nga iyang gipa-blotter sa Cebu City Police Office nga niresulta sa pagpasaka og kaso.
Ang mga Team Rama barangay captains gipangulohan nila ni Phillip Zafra sa barangay Tisa kinsa maoy presidente sa Association of Barangay Council, Joel Garganera kinsa naglingkod na karon isip konsehal sa siyudad, Ramil Ayuman sa barangay Apas.
Si Garganera, sa iyang bahin, nagkanayon nga sa pagpasaka pa lang sa kaso sa Ombudsman, nasayod na siyang daan nga kini ibasura sa anti-graft body sanglit way basehan ang ilang gisang-at nga kaso. /