Maayo mi og performance: Villamater

Gipasigarbo sa hepe sa Talisay Police Station Supt. Jason Villamater nga ang ilang kaso sa kawat ug pagpanulis dako og pag-minus gikan sa Enero hangtod na sa Septyembre karong tuiga itandi sa miaging tuig sa susamang mga buwan.

Ang pamahayag ni Villamater nunot sa report nga gihatagan og duha ka mga semana ang kapulisan sa Talisay pagpakita sa ilang maayong performance aron di sila hulipan sa puwesto ug ipailawom sa re-training.

Matod niya nga gikan sa Enero hangtod sa Septiyembre ang kawat moabot sa 110 ka mga kaso samtang ang tulis 70.

Apan ang maong gidaghanon mas ubos kon itandi sa miaging tuig sanglit sa susamang mga buwan.

Sa 2016, naka-record silag 213 ka mga kaso sa kawat ug 108 ka mga pagpanulis.

Nagkanayon si Villamater nga ilang gidawat ang hagit sa pagpaubos di lang sa kawat ug tulis, kon di sa tanang matang sa mga kremin sa ilang siyudad sulod sa duha ka mga semana.

Samtang labot sa Drug Enforcement Unit (DEU) nga gibungkag na, ang maong mga pulis iya nang gipangdistino sa Motorcycle AntiStreet Crime Operatives (MASCO) aron pagkunhod sa mga street crimes.

Sa pagkakaron, ang ilang prayoridad nga hugtan sa pagbantay diin taas ang kaso sa kremin mao ang barangay Tabunok ug barangay Dumlog.

Una niini, nakontrobersiyal usab ang kapulisan sa Talisay tungod sa giingong pagkalambigit sa ilang mga sakop sa giingong pagpanguwarta. /