PDEA kasugakod kaha?
Pipila ka adlaw human motibugsok ang iyang popularity ug trust rating sa gihimong survey sa Social Weather Station (SWS) sa niaging semana, mipakanaog dayon si Presidente Rodrigo Duterte og kamanduan sa pagpadaplin sa Philippine National Police (PNP) sa iyang kampanya batok sa gidiling drugas.
Gidid-an ug gipahunong niya ang mga kapulisan sa pagpahigayon og mga drug-related operations ug gihatag ang gahum ug katungod niini ngadto sa Philippine Drug Enforcement Agency (PDEA). Kining kamanduan giluwatan sa presidente human sa sunodsunod nga reklamo sa mga pag-abuso sa mga kapulisan nga maoy usa sa mga hinungdan sa pag-us-os sa iyang popularidad ug kasaligan.
Si Duterte mipabuhagay nga mga dagkong isda na karon ang tutokan sa ilang kampanya, ug dili na kadtong mga ginagmay ug kabos nga mga drug personalities nga anaa lang naglihok sa mga hilit-hilit nga dapit.
Atong gihangop ning pamahayag sa presidente, pero mora man og imposibli nga mahimo ni PDEA lang. Pila ra man intawon ka mga tawo ang anaa sa PDEA kon atong itandi sa 160,000 ka mga pulis?
Basin og magkatawa lang unya ang mga dagkong drug lord niini, ilabi na og ilang malihok na ang ilang kuwarta sa pagpangsuborno sa mga dagkong opisyal.
Sa uwahing bahin sa Enero ning tuiga, gitangtang usab ni Duterte ang mga pulis sa iyang kampanya batok sa gidiling drugas apan human sa lima ka semana gibalik ra usab ni niya. Buot ipasabot nga hangtod karon wa pa diay kakita og igong solusyon kining kasamtangang administrasyon kalabot niini.
Sa laktod nga pagkasulti, hangtod di mapakgang kining mga kurakot natong mga opisyal nga anaa sa puwesto, di ta makapaabot nga molubad o mapakgang kining pagkatap sa gidiling drugas dinhi sa nasod. Kini maoy tinuoray.