P500T sa Cebu City Hall nadawat na ni Tabal

Nadawat na ni Southeast Asian (Sea) Games gold medalist Mary Joy Tabal ang P500,000 nga insentibo gikan sa Cebu City Government niadtong Huwebes sa Cebu City Hall.

Si Tabal, 28, gipahalipayan gumikan sa iyang paghatag og dungog dili lang sa siyudad sa Sugbo kon dili sa tibuok Pilipinas dihang naangkon niya ang labing unang gold medal sa Team Philippines sa 29th Sea Games niadtong Agusto sa Kuala Lumpur, Malaysia.

Gipasabot ni Cebu City councilor Jerry Guardo, kinsa maoy nagpasaka sa resulosyon sa paghatag og insentibo kang Tabal, nga nagsilbe sab kining suporta sa dakbayan ngadto sa lumad nga taga Brgy. Guba marathoner hilabi na dihang naka-qualify kini sa Rio Olympics.

Si Tabal maaoy labing unang Pinay marathoner nga nakadagan sa Olympics.

“In behalf of the Mayor (Tomas Osmeña), we turned over the P500,000 check to Mary Joy Tabal. This is as financial assistance for her trainings in her quest for Asian (Games) and the Olympics,” asoy ni Guardo.

“I am very excited and positive that Mary Joy Tabal will fulfill her dream for our country which was also the vision of the honorable Mayor.”

Nadaog ni Tabal ang gold medal sa Malaysia pinaagi sa oras nga 2:48:26 niadtong Agusto 19.

“This is a very big help because my training program is too expensive,” matod ni Tabal sa interbyu sa Sun.Star Cebu, igsuong buhatan ning mantalaan.

Si Tabal, kinsa sakop sa Motor Ace Racing Team, mobalik sa Tuscany Training Camp sa Italy sulod ning buwana aron sugdan ang iyang pagpangandam sa 2018 Asian Games sa Indonesia.