ANDAM NA SA PUJ STRIKE
MANDAUE, LAPULAPU MOPAKATAP OG MGA BUS
Mga 30 ka sakyanan ang giandam sa kagamhanan sa dakbayan sa Mandaue ug Lapu-Lapu agig pagpangandam sa ipahigayong transport strike sa grupong Piston ugmang adlawa.
Sa Mandaue, di mominos sa 20 ka mga sakyanan ang giandam aron unya nga mohatod sa mga ma- stranded nga pasahero paingon sa Foodland, Ayala ug SM.
Matod ni Glenn Antigua, pangulo sa Traffic Enforcement Agency of Mandaue (TEAM), nga niadtong Biyernes nipirma og memorandum si City Administrator Atty. Danilo Almendras nga nagmando sa tanang
department head nga ipagamit ang mga sakyanan sa tanang mga departamento.
Matod ni Antigua nga sa Mandaue, adunay lima ka mga Ceres
bus nga gi- deploy sa Land Transportation Franchising and Regulatory Board (LTFRB), pito ka L-300 van, duha ka flat bed nga sakyanan, lima ka pick-up ug usa ka Kaoshiung bus. Lakip sa nipadayag og suporta sa paghakot sa mga pasahero mao ang MyBus.
“Magpundok lang gyud og usa ka area ang mga pasahero kon asa sila padung kay pangutan-on man sila sa atong personnel,” hangyo ni Antigua sa mga pasahero nga maapektuhan sa strike.
Matod niya, ang mga sakyanan sa dakbayan andam mohatod sa mga pasahero paingon sa tulo ka mga dagkong adtuan sa publiko.
Magsugod og pakatap ang Team sa mga sakyanan gikan alas 5 sa buntag.
Gitataw ni Antigua nga ang iyang mga enforcer didto lang ipakatap sa mga tagsa-tagsa ka pwesto niini aron nga maniid kon may daghang ma- stranded.
Kagahapon sa udto, ang kadagkuan sa Piston niadto sa buhatan sa Team ug nipahibawo nga may aktibidad silang buhaton sa may interseksyon sa Pacific Mall mga alas 6 sa buntag ug molungtad og duha ka oras ugmang adlawa.
Samtang sa Lapu-Lapu, mga 10 ka mga sakyanan ang giandam sa dakbayan lakip na ang lima ka bus nga giandam sa LTFRB, sigun ni City Disaster Risk Reduction and Management Head Andy Berame.
Sa pakighinabi sa Superbalita Cebu ni Berame, kini nagkanayon nga duha ka bus sa dakbayan, lima sa LTFRB ug mga Elf truck sa mga barangay ang giandam kon maparalisar ang mga pampublikong sakyanan.
Ang mga tawo nga di mogawas sa Lapu-Lapu ugma di ra maapektuhan ug ang ilang gikabalak-an mao ang molabang sa Cebu City ug Mandaue City.
Sudgan og pakatap sa LapuLapu ang mga sakyanan mga alas 6 sa buntag. /