P200T reward sa suspek sa pagpatay

Gitanyag nga P200 mil nga reward kagamhanan sa dakbayan sa Talisay aron masikop si Jessie Largo ug sa kauban niining suspek sa pagpatay sa anak sa kanhi reporter sa miaging mga buwan, dakong tabang sa kaso.

Matod ni Supt. Jason Villamater nga ang kantidad nga gitanyag ni Mayor Eduardo Gullas dakog tabang aron mohatag kanila og kasayuran sa nahimutangan karon ni Largo ug sa iyang kauban nga wala pa gyud mailhi og masikop hangtud karon.

Si Gullas nipahibawo nga gikan sa P50 mil ngadto na sa P200 mil ang ihatag niadtong tawo nga makatabang o makatudlo sa gitaguan ni Largo.

Samtang kon masikop usab ang kauban ni Largo, lain nasab nga P200 mil ang iyang ihatag.

Si Villamater niingon nga wala silay hunong sa pagpangita ni Largo gani, aduna silay daghang madawat nga

report kon asa ang nahimutangan niini apan sa ilang pagsusi sa lugar wala na diha.

Hinuon, malaumon si Villamater nga ila ra kining masikop sa dili madugay.

Sa nasayran, si Largo maoy suspek sa pagpatay ni John Ronli Calizar, anak ni Ferliza Contratista, kanhi reporter ug karon naa na sa buhatan sa Philippine Information Agency (PIA).

Ang biktima natulog sa giabangang panimay sa iyang hinigugma nga si Katherine Cabungcag sa dihang gisulod ni Largo, kinsa kanhi uyab ni Cabungcag.

Ang naasoy nga suspek mao usab ang gidudahan sa kapulisan nga responsable sa miaging pipila ka krimen.

Gilauman nga ang pagkasikop niini makatabang sa pagsulbad sa mga kaso hinungdan sa pag-aksiyon sa mayor.