Throwback 2013; linog
Ika-upat nga tuig karon human ang 7.2 magnitude nga linog mi-igo sa Central Visayas diin ang grabeng naapektuhan mao ang pipila ka bahin sa lalawigan sa Bohol. Dinhi sa Sugbo ug Mandaue City adunay nangamatay human malusno ang merkado sa Pasil ug Mandaue Public market. Naguba ang Cebu City Medical Center (CCMC) diin kini gikondenar na ug hangtud nga gi-demolish. Gi-abandonar usab ang Palace of Justice building gumikan kay daghan ang mga liki.
Grabeng naapektuhan ang Bohol kay maoy epicenter. Nangaguba ang mga karaang simbahan ug edipisyo sama sa mga munisipyo. Ang mga konkretong kabalayan nangalusno. Dihay mga patay kay natabunan sa yuta nga midahili sa usa ka sapa sa bukid. Dako nga distroso ang nahi-aguman sa Bohol.
Ambot kon nakabangon na ba ang Bohol karon? Wala na ako makabisita sa maong lalawigan human sa katalagman. Makaduha ako nakabalik sa mga lugar nga naapektuhan sa linog human gyud sa maong katalagman kay nakakuyog ko sa GMA 7 Kapuso Foundation sa relief campaign. Pero nagtuo ko nga aduna pay mga lugar didto nga wala pa makabangon.
Matag usa kanato aduna makalilisang nga kasinatian sa maong katalagman. Una kadtong nakasinati kita sa maong gikusgon nga linog ug natural lang gyud nga malisang ta.
Sa akong bahin, samtang nagpaabot ako nga mobalik sa kahanginan sa akong tulumanon sa DySS Super Radyo kay nakahook up pa kami sa among flagship station, DzBB sa kauluhan, natulog una ako sa akong opisina. Sa dihang mitay-og mga alas 8 pasado, igo lang mibangon ug milingkod sa sofa nga akong gihigdaan. Wa ko makadagan. Ug nagpaabot lang nga mahulog ang fluorescent sa akong tungod o ba kaha malusno ang roof top sa building. Anaa sa second floor akong akong opisina. Pipila ka minuto pa ko nakabarug ug dayon dagan sa announcer’s booth aron mo-programa og balik.
Wa nay tawo sa newsroom ug technician’s booth kay nanagan sa gawas ug nagtapok sa parking area. Way nakapukaw nako. Akong giputol ang Manila hook up ug mi-programa kog balik. Apan diha pay after shocks. Kadaganon ko o dili. Pero mipatigbabaw ang dugo nga pagkabroadcaster. Kon nalusno pa ang building, patay ko. Hatagan ra kog buwak sa GMA management.