12 ‘APIL’ SA SMUGGLING SA CPDRC, GISUSPENSO
10 JAIL GUARDS, 2 KAWANI; MITUMAW SA IMBESTIGASYON SA KAPITOLYO
Moabot sa 12 ka mga kawani sa Cebu Provincial Detention and Rehabilitation Center (CPDRC) ang gipaubos sa preventive suspension ug nag-atubang na’g imbestigasyon sa Committee on Discipline and Investigation nunot sa giingong pagtabang sa pagpalusot og mga kontrabando sa prisohan.
Tungod niani, magkuwang ang mga bantay sa pasilidad hinungdan ang Kapitolyo nihangyo sa Philippine National Police nga magbutang og dugang personnel sa prisohan.
Gikompirmar ni Gobernador Hilario Davide III ang pagpaubos sa preventive suspension sa 12 ka mga personnel sa CPDRC, diin 10 niini mga jail guard ug laing duha ang mga administrative personnel.
Si CPDRC Assistant Warden Audesti Miguel nibutyag nga niadtong Oktobre 13, Biyernes, nadawat sa maong mga kawani ang suspension order gikan sa gobernador.
Ang mga ngan sa gipangsuspenso gipugngan una sa Superbalita Cebu samtang wa pa makuhai sa ilang habig.
Matod ni Davide, 30 ka adlaw ang ilang preventive suspension aron usab di maka-impluwensiya sa imbestigasyon nga gihimo sa Committee On Discipline and Investigation (CODI).
Sigun sa gobernador, consistent ang mga impormasyon nga iyang nadawat nga nagtudlo sa maong mga kawani nga nakatampo sa pagpasulod sa mga kontrabando sa prisohan ug kini matawag na nga misconduct ug neglect of duty.
Tungod sa pagsuspenso sa pipila ka jail guards, giangkon sa assistant warden nga nagkuwang gyud karon ang manpower sa prisohan.
“Actually, that’s the problem. I have actually made recommendations even prior to this one because we are already having very limited manpower,” niingon si Miguel.
Si Davide nihangyo hinuon sa kapulisan nga mag-butang og dugang personnel sa CPDRC.
Sa kasamtangan, dunay duha ka team sa Provincial Public Safety Company ang nakadestino na sa prisohan ug gipatabang sa seguridad sa pasilidad. /