BATA, 9 NALUMOS SA LIM-AW

Usa ka 9-anyos nga batang lalake nalumos sa lim-aw human natagak sa lim-aw sa gikawot nga yuta alang unta sa haligi sa tukoron nga simbahan sa sitio Proper, Barangay Jaclupan, dakbayan sa Talisay niadtong Martes sa hapon.

Patay nga nakaplagan sa mga barangay tanod si Sefury Walteros.

Base sa imbestigasyon sa kapulisan, ang apohan nga si Lilia Labrador nitug-an nga nipauli sa ilang balay ang bata tungod kay way klase.

Giagda pa gani niya kini og kaon apan nibalibad tungod kay busog pa ug nananghid nga magduwa sa duol.

Apan wa na kini wa makauli hinungdan nga iyang gisugo ang maguwang niini sa pagpangita.

Ang maguwang wa mosulti kaniya nga wala makit-i si Sefury hangtod nga nagsugod na sila sa pagpangita niini.

Niadtong Miyerkules sa kaadlawn, ang mga barangay tanod nga nag- roving maoy nakakita kang Sefury nga naglutaw na sa napundong tubig nga patay na.

Nasayran gikan ni Kapitan Joel Obeso sa Barangay Jaclupan nga mga lumolupyo sa lugar nagkasinabot nga magtukod og mas dako nga simbahan tungod kay nagkadaghan sila.

Ang barangay opisyales ug mga lumolupyo maoy mikawot sa yuta aron kabutangan sa mga haligi sa simbahan.

Apan sa pagsige og uwan, napundo ang tubig sa kinawtan nga may igong kaladmon hinungdan nga mao sab kini ang kalingawan sa mga bata sa pagkaligo matag bunok sa uwan.