Gimik ni Digong
Daghang nagtuo nga gimik lamang ni Presidente Duterte kining iyang kasugoan nga bugtong ang Philippine Drug Enforcement Agency (PDEA) mao na lang ang adunay katungod kalabut sa operasyon batok iligal nga drugas. Wa nay labut niini ang Philippine National Police (PNP), National Bureau of Investigation (NBI), Bureau of Customs ug ubang mga ahensiya ug departamento sa gobiyerno.
Gihimo na kini ni Digong niadtong Enero ug Pebrero apan iya ra usab dayong gibalik ang kapolisan tungod sa pagsiaw ug grabeng pagsaka sa pagpamaligya ug pagamit sa ginadiling drugas.
Nganong gibalik na man usab kining maong sistema ni Digong nga nasayud na man siya kon unsay resulta niini? Tinuod bang naapektuhan siya sa survey sa Social Weather Stations (SWS) kalabut sa extra judicial killing (EJK)?
Karon nga sumala sa survey sa Pulse Asia 88% man ang nagpaluyo sa iyang war on drugs iya bang ibalik na usab ang kapulisan sa kampanya batok drugas?
Sumala sa presidente nga kon ugaling mograbe ang addiction ug pagpamaligya og iligal nga drugas maayong adto magpatabang kining mga supak sa iyang kampanya ngadto sa mga human rights group labi na sa United Nations (UN) nga grabing misaway sa EJK.
Sa interview kang Duterte siya niingon nga bisan kon dunay gukoran ang mga sakop sa PDEA nga tawo nga malambigit sa iligal nga drugas kinahanglang magpadaplin ug dili mo-apil ang kapolisan pagdakop sa suspek. Grabe ang maong orden.
Ako nagduda nga tungod sa kapikal ug kahiubos ni Digong sa mga pagsaway sa iyang mga kritiko sa iyang kampanya batok iligal nga drugas nga iyang ipakita sa tanan nga kon dili tinud-on kining maong kampanya nga mobalik paghitak ang shabu ug ubang mga iligal nga drugas ug mapuno na unya ang atong kadalanan sa mga adik nga maglakaw sama sa mga zombie kon patay’ng buhi.
Dinhi na unya niya matulisok kining iyang mga kritiko labi na ang mga human rights groups ug ang gitawag niyag mga bleeding hearts.
Kon mahitabo kini aduna na unyay katarungan nga balikon sa presidente ang iyang hugot nga kampanya batok ginadiling drugas diin mas daghan na unya ang manglit-ad sa kadalanan.