Gasto sa gubat sa Marawi

Gideklarar niadtong Martes ni Presidente Rody Duterte nga gawasnon na gikan sa kuko sa mga terorista ang syudad sa Marawi.

Kini human sa pagkapatay sa lider sa mga terorista nga sila si Isnilon Hapilon ug Omar Maute sa usa ka military operation niadtong Lunes.

Apan napulbos ang pipila ka mga bahin sa maong syudad sa mga bomba nga gihug sa mga eroolanong igugubat sa gobyerno.

Nagsugod pag-atake ang mga terorista nga giingong mga tigpaluyo sa ISIS sa Marawi niadtong Mayo 23.

Human sa hapit moabot sa lima ka buwan nga gubat, niabot sa 163 ka mga sakop sa militar ang napatay samtang lain pang 1,700 ang nasamdan.

Miabot sa 822 ka mga terorista ang napatay ug 47 ka mga sibilyan ang napagan sa maong gubat. Apan nakahibawo ba kamo sa gigasto sa militar sa pagpuhag sa mga terorista sa Marawi?

Si Defense Secretary Delfin Lorenzana niingon nga mokabat sa P5 bilyunes ang nagasto nila sa maong gubat.

Gigasto kini sa mga bomba ug bala, gasolina, pagkaon ug allowance sa mga sundalo sa miaging upat ka buwan.

Apan kon dako ang nagasto sa pagpulbos sa syudad sa Marawi, mas dakong pundo ang gikinahanglan sa pagpabarog niini pagbalik.

Sumala pa ni Lorenzana, labing menos P10 bilyones ang gikinahanglan sa pagtukod pagbalik sa Marawi.

Apan desisyonan pa kon ipreserbar ba ang nagusbat nga syudad sa Marawi ug magtukod og bag-o ug modernong syudad o kaha ayuhon lang kini.