Kalagkalag na sab
Naka-post na ko sa akong Facebook account sa akong pagduyog sa simbahang Katoliko sa pagbangutan sa kamatayon ni Archbishop Emeritus Ricardo Cardinal Vidal niadtong Miyerkules.
Sa pagpanaw ni Cardinal Vidal, napun-an ang mga ‘tighangyo’ sa Labawng Makagagahom sa mga grasya nga atong gikinahanglan. Pahulay sa kalinaw, Cardinal!
○○○ Pila na lang ka katulog ug moabot na ang kalagkalag. Gawas sa pagpamisa ug pagduaw sa mga lubong sa mga minahal, gipaabot usab ang mga kalihukan ug mga kalingawan nga nanukad sa kasadpang bahin sa kalibutan nga may kalabutan sa mga patay, kalag, abat ug uban pang mga linalang sa kangitngit.
Usa ang Star Cinema sa nangandam alang ning higayona. Mao nga ilang ipagawas ang pelikula ni Kim Chiu nga Ghost Bride atol sa maong pagsaulog.
Sa ulohan pa lang, makapaabot ka sa mga esena nga makapanlimbawot sa balahibo labina kay ang direktor mao si Chito Roño nga naila usab sa mga pelikulang panghadlok.
Atong tan-awon kon daghan ba ang maninggit sa sulod sa sinehan. Sa ako nang nasulat sa una, igo ra gyud panington ang akong palad ug lapalapa basta mahadlok na ko.
○○○ Napun-an og usa ka dapit sa pagkaon ug paglingawlingaw ang Danao City sa pag-abli sa Fuel Fusion Bar & Restaurant kagahapon. Naa kini mahimutang sa ikaduhang andana sa Sands Gateway Mall.
Mga pahalipay nila ni Suba Brgy. Captain Jongkie ug Madam Ramonette Durano-Mahinay. Molayat unya ko diha kon makalugar.
○○○ Nalingaw ko sa Seven Sundays nga padayon pa karong gipasundayag sa mga sinehan sa tibuok nasud. Maayong pagkahanay ang mga papel nila ni Aga Muhlach, Dingdong Dantes, Cristine Reyes ug Enrique Gil isip magsuon nga may mga kahiubos sa usag-usa.
Si Ronaldo Valdez nga ilang amahan ang nakapabalik sa ilang panagsuod pero hapit sab mabungkag ang relasyon. Maayo na lang ka nadalig ayom-ayom. May mahinungdanon usab nga papel si Ketchup Eusebio isip pagumangkon ni Ronaldo.
Tinuod, lisod katuho-an nga sayon mahilot ang relasyon sa managsuon pero di na lang nato lalison. Basta god nga nakakita tag pamilya nga ingon adto kasuod ang mga sakop ug mangandoy na lang ta nga ingon adto sab ang atong isig ka pamilya. Ana lang god.
Ang wa lang nako mauyoni didto mao ang pagkapili ni Edward Barber isip anak ni Dingdong ug Iza Calzado. Mestiso ra kaayo kini.