Ikauwaw ba kaha

Dear Papa Joe,

Maayong adlaw diha kanimo. Magpatambag unta ko kabahin sa akong problema. Tawaga lang ko sa pangalan nga Maria. Usa ka inahan apan dili asawa. Naa koy tulo ka mga anak.

Ang akong problema, Papa Joe, sa 10years namong panag-ipon sa akong common law husband wala man gihapon magkita ang akong mga ginikanan ug ginikanan sa akong ka live in. Isig ka ginikanan namo wala pa gyud magkailhanay personally nga unta duol ra man kaayo ang Mandaue ug Cebu City. Kon ako pud sultihan ang akong ka live in bahin ani, moingon ra man nga iya na daw gisultihan iyang mga ginikanan ug moingon lang nga wala padaw silay kwarta. Usahay makaingon ko sa akong kaugalingon nga dili interesado iyang pamilya nga makaila ang akong ginikanan kay pobre ra tawn mi.

Unsa kahay angay nakong buhaton para magkakita ug magkaila ang among isig ka ginikanan? Daghan kaayong salamat MARIA Maria,

Siguro naa pay mas lawom nga rason nganong di ka niya ipaila-ila sa iyang mga ginikanan kay basin naa na siyay gitaguan nga lisod mahibaw-an. Ug ang pinakalisod ana basin naa na siyay gibilin sa iyang pamilya nga laing pamilya ug wala siyay nawong na mopaatubang nimo kay basin di ganahan iyang mga ginikanan kay mas nakauyon sila sa iyang ka live in sauna kay sa imoha. O basin gani wala sila makaila gyud nimo ug ang nahibaw-an nila mao nga naa siyay ka live in.

Siguro mas maayo nga maghinayhinay ka og pangitag paagi nga masusi nimo siya o pasundan o magpangutana ka asa gyud sila gapuyo. Para nako walay rason nganong di ka paila ilahon sa iyang mga ginikanan. Ug syaro wa gyud sad makisusi imong mga ginikanan ana. Usa pa, mas maayo nga magkuha ka ug cinomar para mahibaw-an nimo kon ulitawo ba gyud siya. Daghang salamat sab. PAPA JOE