Ang suki ni Susan
Nahimuot si Susan nga may kustomer nga nagpa-reserba og balig bayinte ka tawo para karong gabii. Alas utso ang gihatag nga eskidyol. Adunay dugang putahe ang gisitar sa kustomer nga dili sagad makita sa restawran ni Susan dinhi sa Sityo Banika, sakop sa Barangay Quiot.
Sikat ang restawran ni Susan dinhi sa Banika. Daghang klase sa sud-an nga mapilian sa kustomer dinhi sa maong restawran. Mahimo sab nga magpaluto ang kustomer sa gusto nilang sud-an. Sama karon nga litsong kawali ug kalderitang kanding ang gidugang nga order sa kustomer.
“Wil, unsa may okasyon nga daghan may imong giparesirba?” usisa ni Susan.
“Mi-teks akong suod nga higala nga dinhi sa imong restawran niya saulugon ang sumad sa iyang adlaw nga natawhan. Moabot siya karong hapon gikan sa bakasyon ug kaila ka kaayo niya. Usa siya sa imong suki,” ni Willy.
Kalit nga daw may mikusi sa dughan ni Susan. Gimingaw siya sa suki niyang si Gary. Duha ka semana nang wa magpakita si Gary sa iyang restawran. Hugot ang pagtuo ni Susan nga si Gary maoy gipasabot ni Willy. Ug gusto sab siya nga magkita ang iyang bana ug si Gary.
Nalipay unta si Susan nga mibakasyon ang iyang bana, apan nasagmuyo siya sa bugnaw nga pagtagad ni Gerry kaniya.Nawala ang tam-is nilang parayganay nga sagad nilang buhaton matag bakasyon ni Gerry.
Opisyal si Gerry sa barko nga iyang gisakyan. Matag tuig siya mobakasyon. Pahimuslan sa magtiayong Gerryang usa ka buwan nga kalipay, ilabi na nga wala pa silay anak. Apan karong bakasyona ni Gerry, miaslom ang ilang relasyon.
“Unsay nahitabo nimo, Ger, nga kalit man lang kag kala- mi” usisa ni Susan nga may kantalita.
“Kinsay malipay nianang taho nga akong nadawat nga aduna ka nay suki nga kinaham!” ni Gerry nga nagmugtok ang panagway.
“Way malisya ang pagtagad ko ni Gary, Ger. Malipay lang kong makita siya kay mawala ang kamingaw ko diha nimo,” pasabot ni Susan.
Kalingawan ni Susan ang ilang G & S Eatery sa sityo Banika. Ang kamatinagdanon nga batasan ni Susan maoy bato-balani sa mga kustomer niya. Adlaw nga kasumaran karon ni Gerry apan way gana si Gerry nga iyang saulugon.
Nangabot ang mga kustomer nga gipa-reserbahan ni Willy. Wa masayop si Susan sa iyang pagtuo. Diha si Gary uban sa iyang mga higala.
“Ger, si Gary, akong suki ug Gar, si Gerry akong bana,” paila ni Susan nilang Gerry ug Gary.
“Salamat nga nakaila ko nimo Ger. Dinhi lang nako sauloga akong adlaw kay gamay ra ang kwarto nga akong giabangan,” ni Gary.
Nahimut-okan si Gerry nga mitutok ni Gary. Nakita niya si Gary nga pareho niyag panagway.
“Gar, mibukal akong dugo nga nakita ka. Nahinumdom ko karon sa panugon sa giila kong inahan nga mitaliwan na, nga si Lydia Pena ang tinuod nakong inahan, Ug aduna koy igsuong kaluha,” asoy ni Gerry.
“Ger, si Lydia Pena ang atong inahan ug ikaw maoy pangandoy niya nga makita samtang buhi pa siya!” ni Gary.
Nakasiguro ni Gerry nga iyang kaluha si Gary. Ug iyang nasuta nga may katarungan nga malipay si Susan nga makita si Gary matag adlaw.
(KATAPUSAN).