BOSTON GIUSBAN SA MILWAUKEE
Daw padayon pa gihapong naapektahan ang Boston Celtics sa kalit nga pagkawagtang sa usa sa ilang sinaligan sa opening day niadtong Miyerkules sa 2017-18 NBA season.
Kagahapon, usa ka adlaw human mapildi sa Cleveland Cavaliers, 102-99, ang Boston nga nakigkombati nga wala si Gordon Hayward, napildi na uSAB SA Milwaukee Bucks, 108-100, ug ning higayona diha na sa ilang korte sa TD Garden.
Sa wala pa ang duwa, si Hayward pinaagi sa video message gikan mismo sa hospital nga mipaabot sa iyang mensahe ngadto sa mga fans sa Boston: “It’s hurting me that I can’t be there.”
Milanog ang abiba sulod sa TD Garden sa dihang si Marcus Smart mitudlo electronic scoreboard diin didto nakita si Hayward nga nagsul-ob og hospital gown nga naglingkod sa iyang katre.
Nihilom sa makadiyot ang sulod sa arena nga naminaw sa hamubong mensahe ni Hayward ug mihugyaw og balik sa natapos ang pagpadungog niini.
Si Giannis Antetokoumpo mipabaha og 37 puntos ug 13 ka rebounds sa kadaugan sa Bucks samtang midugang usab og 15 si Khris Middleton.
Nangulo sa Celtics si Jaylen Brown, 17 puntos ang natali ni Kyrie Irving kinsa milangkat usab og upat ka rebounds, tulo ka assists ug tulo ka steals.
Sa laing duwa, wa magsilbi ang double-doubles performance sa no. 1 pick nga si Ben Simmons ug Joel Embiid sa dihang gilupig ang ilang Philadelphia Sixers sa Washington Wizards, 120-115.
Si Embiid mipugnit og 18 puntos ug 13 ka rebounds sulod sa 26 minutos samtang si Simmons, sa iyang unang adlaw sa NBA, mipaksit og 18 puntos, 10 ka rebounds ug lima ka assists.
Apan panahugpong nila ni John Wall (28 puntos, 8 ka assists) UG Bradley Beal (25 puntos, unom ka rebounds ug tulo ka steals) maoy mipatugbabaw aron ituboy ang Wizards.
Ang San Antonio Spurs, bisan tuod og wala pa ang ilang All-Star forward nga si Kawhi Leonard, mipayukbo sa Minesotta Timberwolves, 107-99.
Lab-as pa sa iyang pagpirma og duha ka tuig nga extension, si LaMarcus Aldridge mihagdaw og 25 puntos ug 10 ka rebounds nga gidugangan ni Danny Green og 17 puntos, tulo niini gikan sa three-point area.
Gipabugnaw sa Orlando Magic ang Miami Heat, 116109, gibuntog sa Grizzlies ang Pelicans, 103-91.