Hope Run ipahigayon karong Dec. 10
Ang Hope Run 2017:Run For Children With Special Needs mopalapad sa ilang kalihukan dinhi sa Sugbo karong Disyembre 10 diha sa Cebu Business Park.
Kini human sa ilang malampuson nga pagpahigayon didto sa Kaulohan sa niaging tuig.
Karong tuiga, duha ka mga lumba ang ilang mapahigayon. Gawas sa Disyembre 10, ipahigayon una ang didto sa Manila sa Disyembre 2.
Ang maong fun run gituyo alang sa Kids Hope Foundation, usa ka non-profit organization kansang katuyoan mao ang pagtabang sa mga batang kabus nga adunay linahi nga panginahanglan.
“With this leg in Cebu, we are hoping to help about 20 to 50 kids. We’re talking about long term help for them for their therapy. Hopefully, we can reach our goals with the help
of Cebuano runners,” padayag ni Aileen Ang, founder sa Kids Hope Foundation Inc., atol sa paglusad sa maong kompetisyon nga gipahigayon kagahapon sa Kidzooona, Robinsons Galleria Cebu.
Lima ka mga kategoriya ang molangkob sa maong lumba ug kini mao ang 21-kilometer, 10K, 5K, 3K ug 1.5K.
“When we started this run in Manila last year we only expected about 2,000 runners but we reached to 6,000 runners. We decided to do it in two places
for this year,” dugang sa tigpasiugda nga si Jon Rovillos.
Matod ni Rovillos mao nga mamahimo kining nationwide nga event ug ang pagpahigayon dinhi sa Sugbo maoy sinugdanan sa ilang lakang.
Gibanabana nga moabot ngadto sa 10,000 ang mosalmot didto sa Kaulohan samtang sa Cebu leg gipanglantawan nga kini dili mominos sa 2,000 ngadto sa 3,000 ka partisipante.
Ang registration fee nagkantidad og P600 alang sa 1.5 kilometer, P700 alang sa 3k, P800 sa 5k, P1,000 sa 10k ug P1,200 sa 21 K.
Hinuon adunay 10 porsiyento nga diskuwento sa magpa rehistro kutob sa Nob 10.