PASAHERO WAY PUAS PAG-ABOT SA CSBT
Usa ka adlaw sa di pa ang Kalag Kalag, nagdasok pa gihapon ang mga pasahero sa Cebu South Bus Terminal.
Labing daghan nga special permit na-isyu sa Land Transportation Franchising and Regulatory Board 7 ngadto sa mga bus nga mobiyahe sa Bato via Barili ug via Oslob tungod sa kadaghang pasahero paingon sa maong mga destinasyon.
Wa na’y hubas-hubas ang mga tawo sulod sa CSBT sukad pa niadtong Lunes hangtod kagahapon.
Wa igsapayan sa mga pasahero ang kuti nga security inspection ug ang taas nga linya, makasakay lang og bus paingon sa ilang mga destinasyon.
Gawas sa ilang bag, bitbit sa magtiayong Raymond ug Rodelyn ang ilang anak nga masuso sa ilang paghulat ug kasakyan sa CSBT.
Nalipay nalang sila kay gihatagan sila’g prayoridad sa linya tungod sa bata. Nauwahi sila sa paglarga sanglit duna pa sila’y gi-atiman nga trabaho dinhi sa dakbayan.
Gikan sa Oktobre 23 hangtud niadtong Oktobre 30, moabot na sa 90 ka mga special permit ang na-isyu sa LTFRB 7 alang sa mga bus nga molabyog og laing rota sa habagatang Sugbo, 73 niini alang sa mga bus nga mobiyahe sa Bato,Santander agi sa mga lungsod sa Barili o kaha sa Oslob.
Matod sa tigpamaba sa LTFRB7, Jun Tumulak, ang labing taas nga linya sa CSBT alang sa mga destinasyon o mga lungsod nga maagian samtang paingon sa Bato.
Gi-monitor usab sa LTFRB 7 ang oras sa pagmaneho sa mga driver.
Gihimug-atan ni Tumulak nga importanteng makapahuway ang mga bus driver, di lapoy ang lawas aron di makompromiso ang kaluwasan sa mga pasahero. /