4 KA MGA TULISAN NAG-AWTO

SALES LADY NAGHUWAT OG BUS SA MINGLANILLA GIBIKTIMA

Sales lady nga mouli unta sa ilang probinsya aron mosaulog sa Kalag Kalag ug managkot gitulis sa upat ka mga tawo nga nag-awto samtang siya nangadlawon sa paghuwat og bus kagahapon sa alas 3:15 sa kaadlawon sa Brgy. Tunghaan, lungsod sa Minglanilla.

Si Jenny Guanzon, 22, dalaga, taga San Carlos Negros Occidental, igo nalang sa paghilak sa pag- report sa kapulisan.

Si Supt. Dexter Calacar, hepe sa Minglanilla Police Station, nipadayag mga doble ang kaguol ni Guanzon kay wa siya makauli sa pagdagkot unta sa iyang mga kabanay nga namataysa Negros ug nadala pa ang iyang kwarta ug mga butang.

Gibutyag ni Guanzon sa kapulisan nga upat ka batan-ong mga lalaki sakay sa kolor itom nga awto nga way plaka maoy nitulis kaniya.

Nadala ang iyang cash nga P2,000, mga sapot balor og P2,000 ug duha ka backpack nga personal nga gamit.

Unang nihunong kang Guanzon ang duha ka mga lalake nga nagsakay og motorsiklo nga nangutana kon asa siya padung.

Paglabay sa pipila ka minutos dihang nakabiya ang motorsiklo, niabot ang kolor itom nga kotse nga walay plaka.

Ningkanaog ang upat ka batan-ong mga lalaki, usa niini dunay dalang armas ug nideklarar og tulis.

Gikuha tanang mga gamit ug kwarta ni Guanzon.

Si Calacar nagkayon nga gipaningkamutan nila nga makuha ang mga kopya sa close circuit television (CCTV) camera sa nahisgutang lugar nga makatabang sa pag-ila sa mga tulisan.

“Posibling natripingan ning biktima sa mga suspetsado. Sabog na seguro sa drugas,” dugang ni Calacar.

Bag-o kining modus nga natala sa ilang lugar nga magkotse ang mga tulisan.

Wa niya isalikway nga di taga Minglanilla ang mga tulisan nga naagi lang sa dapit. /