UWANON KARON.
Usa ka manglimpyuhay sa nitso sa sementeryo sa Pardo, dakbayan sa Sugbo naggamit og maskara nga pang Halloween. Ang Philippine Atmospheric Geophysical Astronomical Services Administration (Pagasa) mipahimangno nga sama kagahapon, uwanon gihapon ang Sugbo karon. Kon moduaw sa sementeryo, pagpayong.
Publiko gipahibawo nga pabiling uwanon ang lalawigan sa Sugbo karong adlawa gumikan sa nasinati nga tropical disturbance o low pressure area (LPA) nga mi-epekto sa nasod.
Matod pa ni Romeo Aguirre, weather forecaster sa Philippine Atmospheric Geophysical Astronomical Services Administration (Pagasa) Mactan nga kagahapon sa ala 11:00 sa buntag mi-landfall ang LPA sa Sogod, Leyte.
Kagabii ang sentro niini nahimutang sa Northern Cebu area na niresulta sa paguwan uwan sa ubang parte sa lalawigan lakip na sa Southern Luzon ug Northern Mindanao.
Sugod kagahapon sa buntag, wa nituang ang uwan.
Hinuon, hinay ra ang nasinat nga uwan sa Metro Cebu, labina nianang hapon.
Gipanglantawan nga light ngadto sa bunok sa uwan ang masinati sa Sugbo karong adlawa ug ugma, Huwebes.
Busa awhag sa Pagasa nga magdala kanunay og payong, labina niadtong moduaw sa mga lubong sa ilang mga mahal sa kinabuhi.
Gipanglantawan nga ang sentro sa LPA mahimutang sa West Philippine Sea o Palawan area.
Dugang pa ni Aguirre nga base sa satellite analysis nga sa Biyernes mo-arang arang ang sitwasyon sa panahon sanglit nag-anam na og palayo sa nasud ang maong tropical disturbance.