Mayor Garcia mibahad sa nanghilo

Mibahad si Barili Mayor Marlon Garcia nga manubag sa balaod ang mga tawo nga responsabli sa pagpamatay sa di mominos 17 ka mga iro ug tulo ka mga iring sa ilang lungsod sa miaging semana. “We will prosecute whoever

is the person nga mastermind aning pagpatay sa mga iro

without conscience nga ato na lang panghiloan,” pasidaan sa mayor sa pakighinabi sa Superbalita Cebu kagahapon.

Si Garcia niingon nga isip mahigugmaon sa mga iro, nasakitan siya nga way kaluoy nga gipamatay ang mga iro ug nibati siya sa unsay gibati usab sa mga tag-iya niini.

Siya dunay pito ka binuhi nga mga iro, tulo niini mga hybrid samtang upat ang mga bisaya.

Ang mayor nagpaabot sa resulta sa imbestigasyon sa hepe sa kapulisan sa lungsod, Chief Insp. Jose Angelo Acupinpin.

Iya kining gitahasan nga subayon ang mga closed-circuit television (CCTV) camera nga namontar sa mga dapit duol sa gilabayan sa mga iro sa Barangay Poblacion.

Base sa pasiuna nga pagsubay sa kuha sa mga CCTV camera, way nakuha nga footages sa mga tawo nga magtumbok sa mga nagpaluyo sa insidente nga naglakaw gikan sa alas 12 sa tungang gabii hangtod sa 4 sa kaadlawon.

Siya nagtuo ang nagbuhat niini dunay kalagot sa mga iro.

Alang niya delikado kining paghilo sa mga iro.

“This is a very dangerous

act nga gibuhat sa yabag nga tawo. Simbako naay mga bata nga nagduwaduwa unya nakagunit sa mga iro nga ilang nahiloan unya mabutang sa baba that is a very dangerous thing,” dugang sa mayor. Kini ang unang insidente nga dunay ingon niini sukad siya ang nilingkod nga mayor sa lungsod niadtong 2016.