Fitness instructor, mag-uuma sikop

Mag-uuma nakuhaan og mga punoan sa marijuana, samtang habalhabal driver ug fitness instructor nadakpan sa managlahing operasyon sa Philippine Drug Enforcement Agency 7.

Si Cresencio Tantiado, hingkod ang panuigon, usa ka mag-uuma sa Brgy. Buhisan, dakbayan sa Sugbu nadakpan sa mga ahente sa PDEA-7 nga nag-amuma sa iyang gitanom nga marijuana.

Si Earl Rallos, operations officer sa PDEA7, mibutyag sa Superbalita nga si Tantiado, dugay nang gireklamo sa mga opisyal sa Brgy. Buhisan tungod sa pagpananom niinig marijuana.

Nalarot sa mga ahente sa PDEA 7 ang siyam ka mga dagkong punoan sa marijuana nga gibanabanang mobalor sa P30 mil pesos.

Si Tanatiado nga nahinabi sa Superbalita nagkanayon nga iyang paryente maoy nag-supply niyag mga liso sa marijuana.

Samtang kagahapon sa kadlawon, usa ka habalhabal driver uban sa iyang asawa nadakapansa bust bust operation sa PDEA7 sa may A. Lopez Brgy. Labangon, dakbayan sa Sugbo.

Si Camilo Vallecera, 48 minyo, habalhabal sa mao- ng dapit gipusasan uban sa iyang asawa nga si Elizabeth, 47.

Nakuha gikan nila ang duha ka bultong shabu nga mobalor kapin sa P60,000 ug P1,000 nga buy bust money.

Si Villacera, mibutyag nga nagnegosyo siyag shabu samtang mosuyop sab siya kay tambal kini sa iyang diabetis. Ikaduha na niyang higayon nga nadakpan.

Laing gipusasan sab atol sa buy bust sa PDEA7 kahapon sa kadlawon sa Sitio Sta. Ana, Brgy. Labangon.

Si Fergus Arvin Arellano, 37, fitness instructor sa maong dapit, ang nasikop uban sa iyang higala nga si Markey Bayno, 19, tinun-an sa usa ka unibersidad sa Cebu City.

Nakuha gikan nila ang tulo ka bultong shabu nga mobalor sa P90,000 lakip sa buy bust money nga P31,000.