LAHUGAY SA MGA WARDEN: BJMP
Mopatuman og lahugay sa ilang mga jail warden ang Bureau of Jail Management and Penology (BJMP) 7 karong buntag. Si JCSupt. Dennis Rocamora, director sa BJMP 7, nagkanayon nga nahitabo ang lahugay gumikan sa pagkabakante sa posisyon nga gibiyaan ni JSSupt. Hilbert Flor isip Assistant Regional Director for Administration (ARDA), kinsa gitudlo nga director sa training center sa BJMP.
Sugod karong adlawa, molingkod isip ARDA si JSupt. Arnel Peralta kinsa maoy most senior sa mga nagranggo og jail superintendent ug iyang nabiyaan ang posisyon isip jail warden sa New City Jail.
Mohulip kaniya isip Officer In-Charge sa City Jail mao si JSupt. Renante Rubio gikan sa Mandaue City Jail ug temporaryo usab nga mohulip kang Rubio sa Madaue mao si JSupt. Jessie Calumpang gikan sa BJMP7.
Samtang molingkod usab isip bag-ong pangulo sa Medellin district jail si JCI Dennis Aliño sanglit nilapas na sa duha ka tuig ang pagdumala ni JCI Ebylino “Lines” Escaño.
Matod pa ni Rocamora nga gipangbutang isip OIC silang Rubio ug Calumpang sa Cebu City ug Mandaue City sanglit karon pang buwan sa Nobiyembre molampos sa ilang schooling ang duha ka jail superintendent nga ibutang unay sa duha ka pasilidad.
Gihulagway sa bag-ong heneral sa BJMP nga nakaalert ang ilang buhatan gumikan usab sa Kalagkalag.
Gipahibawo ni Rocamora nga walay turn-over ceremony karong adlawa og directa ra nga molingkod ang bagong mga warden.
Si Rocamora gikatakda nga mobisita karong adlawa sa jail facility sa Negros Oriental sanglit iyang gipadayag nga wala pa sila makapahigayon og inspection sa ilang pasilidad human kini nabalik sa hurisdiksyon sa Region VII sukad gibuak ni Presidente Rodrigo Duterte ang Negros Island Region. /