Tinud-on paghipos
Naukay ang lungsod sa Barili human mangamatay ang 17 ka mga iro ug lima ka mga iring kay giingong gipanghiloan. Nakaplagan ang mga mananap sa hawan nga lugar sa Barangay Poblacion nga dunay timaan nga sila gipanghiloan. Buot ni Konsehal Julieto Flores nga ma- autopsy ang lawas sa mga mananap aron mahibaw-an ang matang sa kemikal nga nakapatay sa mga mananap.
Hayan di aksidente ang pagkahilo nila, kon di tinuyoan tungod sa kadaghan sa mga mananap nga nangaigo. Ang naghimo niini way pagbati sa mga hayop.
Tinuod, dunay daghang mga iro nga naglaroylaroy sa mga karsada nga wa nay tag-iya. Kon duna may tag-iya, pinasagdan na sila.
Daghan sa mga kaso sa paak sa iro nga way matumbok nga tag-iya kay wa na say mangangkon. Duna say mga hitabo nga ang iro maoy hinungdan sa mga disgrasya sa karsada.
Nahitabo kini tungod sa pagpabaya sa mga tawo ug sa kagamhanan. Daghan sa mga nanag-iya og iro nga wa magpakabana sa paghipos niini. Inay hiktan, pasagdan lang kini nga maglaroylaroy.
Ang lokal usab nga kagamhanan kuwang sa pagpakabana sa pagdakop sa mga iro nga naglatagaw sa kadalanan. Unta kon ilang gihimo ang ilang katungdanan, mominos ang mga kaso sa rabies o kaha, hingpit kining mahanaw.
Wa na usab untay mga tawo nga nagmotor nga naaksidente, nga niresulta sa pagkaangol o kamatayon.
Maayo unta kon seryusuhon sa mga local government unit (LGU) ang kampanya sa pagpanghipos sa mga iro ug iring nga naa sa daplin sa kadalanan.
Magmalampuson lang usab kini kon dunay kooperasyon sa matag barangay nga mas nakahibawo asa kining mao nga mga hayop. Panahon na nga sulbaron kining problema nga sayon ra unta, apan gituhiktuhikan lang sa pagsulbad.