Kalag Kalag sa karaan

Ang kaikag sa pagsaulog sa Adlaw sa mga Minatay sa kanhiay natingob diha sa pagduaw sa kalubngan ug pag-andam sa mga halad sa mga kalag.

Kaming mga bata bation dayon ang kamaya ning adlawa tungod sa halad nga mga delicacies sama sa budbod, bingkang pinalutaw ug sa linutog baga.

Naa poy pinisi, biko ug puto. Samtang sa lamesa mag-alisngaw ang tinulang manok, adubong manok nga bas-on pag-ayo sa mantika ug galong tuba.

Sa kilid sa talad may mga tinustos nga tabako nga gilaray alang kuno sa mga tiguwang hinabako ug sigarilyong sport alang sa mga batan-ong kalag.

Kini ang ritwal nga gisunod sa akong namatay nga inahan: manapit siyag 12 ka mga silingan o kabanay nga mosabat sa pangadye.

Untop alas otso sa gabii manangpit ang akong inahan sa tanang kalag sa mga kabanay, silingan ug higala nga nangamatay na kasagaran inighuman sa pangadye.

Gidili ang pag-una og kaon aron di masakit. Kaming mga bata maglaway lang tawon maghuwat kanus-a sugdan ang kaon.

Inighuman og pangagda sa sugo sa akong inahan ipanglabay ang mga ulo, pako, liog ug isol sa manok sa gawas alang kuno sa manggiuwawon nga mga kalag.

Di ko kalimot sa akong inhan ug sa among kalag-kalag. Apan sa paglabay sa katuigan dihang patay na siya, wa nay kalag-kalag nga mahitabo.

Lahi na karon nga panahon ang kalag-kalag anha na sa mga minteryo diin ila pang sagulag sabog-sabog ug huboghubog. Wa nay pagtahod sa mga patay.

Kaming mga bata bation dayon ang kamaya ning adlawa tungod sa halad nga mga delicacies sama sa budbod, bingkang pinalutaw ug sa linutog baga.