Bato sa Kongreso

Kalag Kalag na sab.

Ug segurado nga magkalag-kalag na sab ang kadalanan ug mga pantalan sa mga pasahero.

Daghan na sab ang mag-problema, dili kalukat og ticket, dili kasakay, maulahi sa biyahe.

Kon makasakay man gani, segurado nga puno kaayo ang sakyanan sa mga pasahero ug kargamento. Maghuot na sab kay gusto sab sa mga nagmaneho nga makadugang sa ilang kita, bahala og dili na komportable ang ilang mga pasahero.

Apan dili na bag-o kining tanan.

Mao kini ang kasagaran nga mahitabo panahon sa Kalag Kalag nga mao sab ang panahon sa pagpauli aron pagbisita sa mga namatay. Daghan ang mabulahan panahon sa Kalag Kalag.

Kusog ang halin sa mga kandila nga idagkot sa mga namisitahay. Kusog sab ang palit sa mga bulak nga idayan-dayan sa nitso.

Sundon ra sab sa nagbaligya ang mipalit kay inig kahuman sa pangadye ug pagbisita, biyaan na nila ang gidagkotan nga kandila.

Ang dinagkotan nga kandila ingon man ang tinulo niini mahimo nga tunawon na sab para sa ilang himuon nga mga kandila.

Ang uban sab, magdala og silhig ug sundang aron moboluntaryo nga limpiyohan ang nitso sa bisitahon nga patay. Siyempre, dunay bayad ang paglimpiyo sa nitso.

Apan kasagaran, dili magsapayan ang mobayad kay kabubut-on ra man sab niya og pila ang iyang ihatag sa naglimpiyo samtang dili na hasol ang paghinlo sa mga sagbot og uban pa nga mga hugaw sa palibot sa nitso.

Dunay daghang patutsada karon nga posible nga modagan pagka-presidente si Gen. Ronald “Bato” dela Rosa sanglit padung man siya mo-retire isip hepe sa PNP karong Enero 21, 2018 atol sa iyang ika-56 nga kasumaran.

Daghan sab ang nagtuo nga modagan pagka-senador si Bato.

Apan kon akoy pangutan-on, gusto nako nga molansar pagka-kongresista si Bato sa Bohol.

Mismo sa 1st district sa Bohol siya molansad sanglit aduna siyay kaliwat nga taga-Antequera, Bohol si Bato.

Mosamot kanindot kon buhaton niya kini sa piniliay sa 2019.

Nganong sa 1st district sa Bohol man siya molansad?

Nindot kini sanglit naila man ang lalawigan sa Bohol nga usa sa pinakadaghan nga naulipon sa ginadiling druga dinhi sa Central Visayas. Mas daghan pa gani ang sa Bohol kon ikomparar sa Cebu, Negros Oriental o Siquijor.

Dako og ikatabang si Bato sa kampanya sa druga sanglit daghan na man siya og nahibaw-an bahin sa lista ni Presidente Digong sa mga nalambigit sa tokhang.

Ikaduha, dili lisod ibaligya si Bato sa mga botante, labi na kon tabangan siya ni Presidente Digong sa kampanya.

Dili na magkinahanglan og dakong kantidad si Bato sa iyang kandidatora sanglit napamatud-an na kini sa kadaogan ni Presidente Duterte sa miaging piniliay.

Andam mogasto ang mga botante alang sa kadaogan sa ilang kandidato kon kombinsido sila sa katakos niini.

Nailhan na sab si Bato sa katawhan ug wala sab siya maapil sa mga pangurakot.