Forgiveness is not enough
Wa gyud nako kalikayi nga maglagot. Si Reene ug Joyce malipayon kaayong nag-estoryahay. Sus, kaayo gyung dasmagan ni Joyce, uy! Tiaw moy kanunay siyang mohapak sa bukton ni Reene. Ug si Reene sab, morag giganahan.
Kinsa man say di maglagot, bi? Boyfriend ko si Reene, ug si Joyce maoy labi kong suod nga amiga. Aw, best friend gud. Gani, si Joyce pa ang nagpaila-ila kang Reene nako. Ug mao pa gyuy bearer ni Reene sa pagpangulitawp ani nako. Schoolmate ko si Joyce sa UC. Nagkaila mi dihang nagka- share mig table sa pagesnak namo sa school canteen.
Dasig nga pagka babaye si Joyce. Dali rang nakuha ang dako kong pagtagad niya. Nindot siyag mga jokes, di korni. Mahikatawa gyud ko. Kon hitsura, aw guwapa sab siya. Unya usa ka higayon nga birthday niya ug dunay party sa ilang balay, iya kong giimbetar. Silingan sila si Reene ug mitambong kini sa
birthday party ni Joyce. Sa maong higayon mi nagkaila si Reene pinaagi ni Joyce.
Ug karon, morag nagselos ko sa ilang ka-sweet. Usahay pa gani magkuptanay sila sa kamot.
Molakaw na unta ko aron paglikay nga makabuhat kog eskandalo kay nagkadako ang gibati kong pagpangabubho kanila ni Reene ug Joyce. Apan nakita ko nila.
Nagdali silang miduol nako. Wa na ko makalikay.
“Abi kog ganinang buntag ka rang nanagkot, Grace?”
Mikupot si Reene sa akong kamot. Gusto ko untang iwakli ang kamot sa akong boyfriend apan nahunahuna nako nga di ko angay ipakita niya nga nagselos ko kanila ni Joyce.
“Init ganina. May nang karong hapon kay landong.”
Mitan-aw ko kang Joyce. Nagpahiyom siya nako. Gipahiyoman ko sab siya apan nakahibawo ko nga pagpakaaron-ingnon lang ang gipakita ko niyang pagtagad. “Ganina ka ra dinhi, Grace?” Gusto na gyud unta nakong kusmoran si Joyce apan nagpugong lang gyud ko sa akong kaugalingon. Morag nahilaw ang kinataw-an ni Joyce dihang gitando ko siya.
“Nakita ta gani mo si Reene, Joyce. Mora gyud mog uyab kay sweet kaayo mo.”
Gusto kong singkahan si Joyce apan gialam-alaman ko ang akong kaugalingon nga angay kong magmabugnawon sa akong ulo kay daghang tawo sa sementeryo. Nagtinan-away sila si Reene ug Joyce.
Namatikdan ko nga nagblush ang nawong sa akong boyfriend. (SUMPAYAN)