Tulo ka rosas
Ugma Nobiyembre uno na. Mao ni ang adlaw sa mga Santos apan daghan na ang mangadto sa sementeryo ning adlawa bisan og sa Nobiyembre dos pa ang adlaw gyud sa mga minatay o mga kalag ug si Nimpa karong adlawa nangandam na sa mga dad-unon nila ngadto sa sam-ang. Patay na ang iyang bana nga si Ador. Lima na ka tuig ang nakalabay, pero alang kaniya ingon sa anaa gihapon si Ador kauban niya. Dinhi sa ilang balay nga nahimutang halayo sa lungsod, ingon sa buhi si Ador ug kini anaa kanunay matag gutlo nga duna siyay buhaton. May tulo sila ka anak, sila Adel, Lily ug Remy. Mga dalaga na sila ug si Nimpa morag igsuon lang pod sa iyang mga anak inigpanimba nila.
Batan-on pa si Nimpa nga naminyo kang Ador kaniadto. Sa iyang pangidaron karon nga trayintay siyete nindot gihapon ang iyang lawas ug busok pa ang iyang dughan. Mao bitaw nga daghang misuway sa ilang gugma kang Nimpa, apan kahibulongan kaayo kay sa matag higayon nga dunay mamisita kaniya, mokalit man lang pag-alisbo ang alimyon sa bulak diha sa ilang hardin sa tugkaran. Ug sundan kini sa baho sa kandila. Unang makatimaho si Nimpa ug dayon ang iyang mga maghahalad nga mobati sab og katingala. Nakasabot si Nimpa nga dili gayud mosugot si Ador nga maminyo siya pag-usab.
Ang namatyan ni Ador mao ang bala sa kalibre .45 nga miigo sa iyang dughan. Pulis si Ador ug nahitabo kini dihang duna silay gihimong Tokhang Operation sa usa ka balay nga nahimutang sa usa ka hilit nga bahin sa siyudad. May mipusil kanila ug si Ador ang unang naigo sa bala sa kamatayon. Dihay kauban niya nga naigo sa bukobuko. Mibawos ang mga pulis ug napatay nila ang armadong mga drug pusher ug mga drug addict sulod sa maong balay. Gidala dayon si Ador sa iyang mga kaubang pulis sa ospital sa lungsod apan gi-deklarar kining ‘dead on arrival’ kun DOA.
Ug karon nangandam na sila si Nimpa ug si Adel.
“Ma, dili man kini sa pag-unsa, mahitabo man gyud nga mangaminyo mi, kay duna baya miy mga uyab. Mahitabo gyud unya nga dad-on mi sa among mga bana ug ikaw na lang unya mag-inusara dinhi. Dili ra ba ka hilig nga mokuhag katabang. Wa pa gyud kay napilian sa imong mga ‘suitor’, Ma? Aron
duna ka nay ‘partner’ hulip kang anhing Papa Ador?” padayag ni Adel kang Nimpa.
“Husto ka gyud, Adel. Pero kon dunay mamisita nako morag magpabatyag si anhing papa nimo Ador, kay masingo man ang kahumot sa alimyon sa bulak ug manimaho ang aso sa kandila. Mora bag nagpabatyag si Papa mo nga dili siya gusto nga maminyo kog usab. Abubhoan ra ba to si papa ninyo,” ni Nimpa nga wala motan-aw kang Adel. “Ugma inig-adto nato sa sementeryo mananghid ko niya. Kon di siya mosugot, di na lang sab ko magminyo pag-usab.”
PAGKA UGMA nakugang si Nimpa sa iyang nakita sa lamesa sa sala. May tulo ka mga bulak sa rosas nga bag-o pang kinutlo. Diha pa ganiy mga yamog nga nagpatong sa mga dahon nga naapil sa pagkutlo. Mikuba-kuba ang dughan ni Nimpa. Si Ador sa buhi pa hilig mangutlo og buwak sa ilang hardin ug paborito niya ang mga rosas. Wala lang siya magsaba sa tulo niya ka anak bahin sa iyang nakita.
Didto sa sam-ang human ikapahimutang ang tulo ka buok preskong mga rosas sa nitso ni Ador gidagkutan ni Nimpa ang mga kandila. Unya hinay siyang namulong, “Ador, sayod kong dili ka gyud gusto nga mangita kog ipuli nimo, sayod kong ikaw ang mikutlo sa mga rosas nga akong gidala dinhi. Oo, dili ko magminyo pag-usab kay ikaw man ang akong gugma. Ug sayod sab kong imo kong gipaabot diha sa bag-o mong kalibutan. Mag-uban ra unya kitang duha diha sa gitakdang panahon sa Gamhanang Magbubuhat alang kanato.” Ug may mga luha nga milugmaw sa iyang mga mata. Mihingos-hingos siya ug mibakho.
(KATAPUSAN)