Child abuse
Dear Atty. Joan,
Ako si Marie. Aduna tay giingon nga child abuse, pero kinsa diay ang matawag nato nga “bata”?
Marie
Dear Marie,
Salamat sa imong pangutana. Importante kini sa hisgutanan sa child protection.
Ang child protection nagtubod sa katungod sa mga batan-on nga maproteheran sa abuso ug sa mga balaod nga nagdili sa maong abuso. Para epektibo ang pagpatuman nato sa atong mga child protection laws, importante nga kita mahibalo kung kinsa ang sakop sa atong maong mga balaod.
Ubos sa United Nations Convention on the Rights of the Child (UNCRC), ang bata kay katong mga nagpangedaron ug ubos sa 18 o giingon tang mga below 18 years old. Buot pasabot, ang mga nakalista nga mga katungod sa UNCRC kay mapahimuslan sa mga bata nga ubos sa 18 anyos ang pangedaron.
Apan, ubos sa atong balaod batok child abuse o ang Republic Act No. 7610, dili lamang edad ang basehan nga ang usa ka tao kay matawag nga bata ug makapahimulos sa proteksyon sulod sa maong balaod.
Sulod sa RA 7610, ang mga bata nga protektado gikan sa abuso kay katong (1) ubos 18 anyos ang edad ug katong (2) bisag pila pa ang edad, ubos o labaw pa sa 18, pero mahitungod sa usa ka physical or mental disability dili makahimo ug protihir o panagang sa kaugalingon gikan sa abuso, pagpahimulos, diskriminasyon o neglect. Tataw sa maong probisyon nga bisan og ang edad sa usa ka biktima sa abuso kay labaw na sa 18 ang edad pero siya nag-antos sa usa ka physical or mental disability ug niresulta kini sa iyang kalisdanan sa pagproteher o pagdepensa sa iyang kaugalingon gikan sa abuso, pwede nga adunay child abuse nga nahitabo.
Hinaot akong natubag imong pangutana. Kung aduna kamoy mga pangutana kabahin sa pagproteher sa mga bata, mahimo kamong mucontact sa 0908896- 0355 o mu-email sa clb. bbtt@gmail.com.
Hinumdumi nga kini nga opinyon nag-base lamang sa inyong lakbit-saysay ug kini pwede nga mausab kun dugang pa nga mapatin-awan ang mga detalye.