Narvasa angay na'ng mo-resign
Wa pa man tuoy katino-an, apan kusog ang huhungihong karon didto sa Kaulohan nga posibling palagputon sa board sa iyang puwesto si PBA Commissioner Chito Narvasa.
Dili usab halayo ang pangagpas nga mapugos si Navasa sa pagluwat sa iyang katungdanan tungod sa pressure sa mga teamowners.
Mora man gud og wa matagbaw ang kadaghanan sa mga tag-iyag team sa performance ni Narvasa ug gani di nato ikalimod nga napuno sa kontrobersiya ang iyang pamunoan.
Ang uwahing kontrobersiya diin gibaha siya og maayo sa mga pagsaway gikan sa mga PBA fans mao ang pagaprob niya sa San Miguel-Kia Picanto trade.
Ang Kia nga mao untay no. 1 pick sa niaging PBA Rookie Draft mibaylo sa ilang katungod ngadto sa San Miguel Beer bugti sa beteranong si Ronald Tubid, laing duha ka players ug ang 2019 first round pick.
Tungod niini, gihulagway si Narvasa nga bias ngadto sa San Miguel Beer tungod kay klaro kaayong pabor ang Beermen sa maong deal.
Personally, dili ko kabasol sa San Miguel kay igo ug ila man sab nga katungod ang pagpangita og paagi nga dugang mapalig-on ang ilang team.
Ang Kia maoy angay buthan sa tanang mga pagsaway tungod kay imbis mopalig-on sa ilang team, di man sila mahinugnan sa kahigayonan kay yano ra man kaayo nila kining ihatag ngadto sa uban.
Mora man og way gana nga mopalig-on kining Kia sa ilang team. Duha ka sunodsunod ka higayon kini nila buhata.
Sa niaging tuig ila usab nga gi-trade si Troy del Rosario ngadto sa TnT Katropa bugti sa mga players nga ubos kaayo og kalidad.
Unya nakakuha na unta sila og mga maayong players sama nila ni Aldrich Ramos, Nino Canaleta, LA Revilla ug uban pa pero yano ra usab nilang gibuhian. Lahi sa uban, nangita sila og mga players nga ubos og kalidad kay makabarato sila sa presyo.
Sa ato pa way tinguha sila nga makampyon. Bad publicity ni sa ilang kompaniya. Makahatag sab ni og negatibong epekto sa lega tungod kay mawad-an man og interest ang mga tawo. Kinsa may ganahan unya motan-aw sa ilang mga duwa.
Daghan ang nangandoy nga mahitapo si Standhardinger sa laing team gawas sa Ginebra ug sa San Miguel aron dunay ikaparang sila si JuneMar Fajardo, Greg Slaughter ug Japeth Aguilar aron modugang sa pagpa-anindot sa mga duwa nga makadugang sa interest sa paying public.
Mao ni papel ni commissioner Narvasa. Ang pagtankon wa bay dakong bintaha nga nahimo sa binayloay og players ug pag-implementar og mga lagda aron makabalanse sa mga teams. Pero mora man og gibaliwala niya ang sentimento sa mga PBA followers.
Para nako angay na lang sab siguro nga taktakon o kaha mo-resign na lang ni si Narvasa sa iyang position kay pulos ra man kontrobersiya ang iyang natampo sa lega.
Lisod na sab unya alang kaniya ilabi na karon nga naduhigan sa pagduda ug naalegahan na nga aduna siyay gipaburan nga mga teams.
Igo na siguro alang ni Narvasa ang niaging walo ka conferences diin unom ka mga kampiyonato niini nalangkat sa mga teams ubos sa SMC, usa sa MVP team nga mao ang TNT Ka Tropa ug ang laing usa naangkon sa Rain or Shine Elasto Painters.
So, enough is enough for Narvasa. Resign now!