50K residente makabenepisyo sa P10K
Moabot ngadto sa 50,000 ka mga residente sa dakbayan sa Sugbo ang gipaabot nga makabenepisyo sa P10,000 nga sustainable
livelihood assistance sa Department of Social Welfare and Development ( DSWD).
Si Catherine Yso, chief of
staff ni Mayor Tomas Osmeña, nagkanayon nga naduso na pinaagi sa Department of Social Welfare and Services ( DSWS) pinangulohan ni Leah Ouano-Japson ang mga papelis duha na ka semana ang nakalabay.
Matod sa chief of staff sa mayor nga gisugdan nag susi sa DSWD 7 ang matag aplikasyon sa naduso ngadto sa ilang buhatan kon kumpleto ba ang mga dokumento nga ilang nahatag.
Gipadayag ni Yso nga pipila sa mga rekisito mao nga ang aplikante nagpuyo sa siyudad, lehitimo nga nanginahanglan sa maong ayuda ug adunay organisasyon sanglit ang maong pundok (adunay miyembro nga lima ngadto sa 30) maoy hatagan og account sa DSWD ug adto ra usab didto ideposito sa mga benepisyaryo ang ilang pag-uli sa puhonan.
Dugang niya nga mag-agad kini sa by laws nga gisubay sa matag organisasyon ( fish vendor, fruit vendor, LGBT, senior citizen) ug ubang mga pundok, kon unsa ug tagpila ang ilang nasabutan nga remittance matag semana o buwan nga maoy ilang ideposito sa ilang bank account.
Gihulagway ni Yso nga kadtong di makaimpas sa ilang utang, ang ilang organisasyon di na mahimong makareloan samtang ang maayong mobayad mao ray makabenepisyo.
Si Osmeña maoy nangusog aron makaapil ang mga Sugbuanon sa maong programa sa DSWD sanglit dihang niadto siya sa Manila, nakadungog siya nga adunay programa ang DSWD alang sa mga kabus hinungdan nga iya usab dayon gipaabot sa taga dakbayan.
Kon maaprobahan sa DSWD ang tanang aplikasyon, magahinan ang Cebu City og P500 milyones gikan sa P7 bilyones nga gigahin sa nasudnong buhatan alang sa tuig 2017.