34 ka contingent na ang mga nagpalista

Di mominos 34 ka mga contingent ang moapil sa umaabot nga Sinulog Grand Parade nga ipahigayon sa ikatulong Dominggo sa Enero.

Si Konsehal Dave Tumulak, chairman sa executive committee sa Sinulog Foundation Inc., nibutyag nga adunay 20 ka mga delegasyon gikan sa Cebu City ang moapil, pito ka mga lungsod gikan sa lalawigan sa Sugbo ug pito ka delegasyon gawas sa Sugbo.

Ang Sinulog sa Kabataan gilangkuban sa barangay Labangon, Duljo Fatima, Sawang Calero, Basak San Nicolas, Tisa (BMO), Bacayan, Tisa, San Roque, Bulacao, Buhisan, Apas (BMO) Sta. Cruz, Mambaling, Guadalupe, Mabolo, Cogon, Lahug, Sapangdaku, San Nicolas Proper ug Pasil.

Ang Sinulog sa Lalawigan langkuban sa Naga, Tuburan, Ginatilan Elementary, Ginatilan High School, Talisay, Carcar ug Bogo. Molangkob sa out-of-town

contingent mao ang mga lungsod sa Panglao, Kidapawan, Catbalogan, Dumaguete, Pamplona , Abuyog ug Bais City.

Si Tumulak nagkanayon nga andam na sila sa Sinulog hilabi na sa kahapsay ug kalinaw.

Matod niya nga kinahanglan nga mahuman og alas 4 sa hapon ang street dancing sanglit alas 5:44 mosawop ang adlaw karong Enero 21 sunod tuig ug dali rang mongitngit.

Ang mga billeting center sa mga dancers langkuban sa Abellana, City Central, Regino Mercado, Zapatera, Guadalupe ug posible ang Labangon.

Ang Sinulog sa Kabataan manukad sa Plaza Independencia inay sa Fuente Osmeña paingon sa Abellana.

Ang Sinulog Grand Parade mosubay sa unom ka kilometro nga karsada nga manukad sa dalan Borromeo sa downtown.

Sa miaging tuig, aduna lay 23 ka mga contingent diin si Tumulak nagkanayon nga posibleng mapun-an pa ang mga out of town contingent.

MOIMBESTIGAR

Gipadayag ni Tumulak nga ilang susihon ang mga report nga adunay mga estudyante nga gipaapil nga supak sa nasabutan sa mga opisyal sa SFI.

Si Mayor Tomas Osmeña wa nitugot nga adunay estudyante nga moapil sa Sinulog kay makabalda sa ilang pagtuon tungod sa taas nga preparasyon.