Grupong tigkilkil gi-monitor sa Centcom
Nag-monitor ang Central Command ug kapulisan sa dakong grupo nga giingong nalambigit sa extortion sa mga mining companies ug mga dakong kompanya sa Sugbo isip revolutionary
tax sa mga rebelde.
Mibahad na usab si President Rodrigo Duterte sa mga sakop sa New People's Army ug mga supporter niini nga gawas nga ilhon silang mga terorista, gukdon na usab sila sa ilang extortion activities sa mga dakong kompanya ug mga minahan sa nasud.
Usa sa iyang pagpanghadlok mao ang pagpasira sa mga minahan kon padayon nga mohatag sa mga rebelde isip revolutionary tax nga gihulagway niini nga dagkong salapi ang makuha sa mga sakop sa NPA.
Ang Information Officer sa Central Command nga si Lt. Col. Medel Aguilar mitug-an nga wa pa sila makadawat og report nga duna nay nabiktima sa Sugbo ug ubang bahin sa Kabisay-an nga gikolektahan ug revolutionary tax sa mga rebelde. Apan adunay grupo nga gisubay karon sa Centcom nga giingong maoy pundohanan og multi million pesos gikan sa gawas sa nasud alang sa ilang mga kalihukan.
Wa mohatag og ngan ang Centcom kon unsa kini nga grupo apan matod niya nga kining maong institusyon maoy dunay mga programa alang sa giingong pagpanalipod sa kalikupan ug uban pa.
Samtang gisaad sa Police Regional Office (PRO) 7 nga abagan nila ang militar sa pagbantay sa pagpangolekta og buhis sa mga rebelde sa mga dagkong kompanya nga nagbase sa Central Visayas.
Matod ni P/CSupt. Jose Mario Espino nga sukad siya nilingkod isip hepe sa kapulisan sa Central Visayas, usa pa ka kaso ang ilang nasugatan nga nangilkil sa usa ka kompaniya apan di hinimoan sa rebelding grupo.
Awhag sa Centcom ug PRO 7 sa publiko ug dagkong mga kompaniya mismo nga mo
report sa mga awtoridad kon makadawat silag suwat labot sa pagpangolekta og buhis alang sa mga rebelding grupo.