190 scholar nakadawat og cash incentive sa Cebu City Hall
Moabot og 190 ka scholars nakadawat og incentives gikan sa dakbayan sa Sugbo.
Gitunol na kagahapon sa City Government ang cash
incentives sa mga Cebu City scholar kinsa ni- graduate karong tuiga nga nagdala og taas nga pasidungog. Si Konsehal Joy Young,
chairman sa committee on education, nagkanayon nga 190 ka mga tinun-an gikan sa lainlaing eskwelahan nga gipangulohan sa ilang nag-inusarang Summa Cum Laude nga si Jireh Bautista.
Si Bautista kinsa gradwado gikan sa Cebu Institute of Technology-University (CIT-U) nakadawat og P20,000 ug plaque of recognition.
Nieskwela siya sa San Nicolas Elementary School ug Cebu City National Science High School kinsa ni- graduate isip valedictorian diin ang iyang igsuon nga si Gideon Bautisa ni- graduate usab sa CIT-U isip Magna Cum Laude sa miaging tuig.
Laing siyam ka mga Magna Cum Laude ang nakadawat og tag P15,000 samtang 180 ka mga tinun-an ang Cum Laude.
Base sa academic grading system sa Pilipinas, ang Summa Cum Laude nakakuha og grado gikan sa 1.00-1.20, Magna Cum Laude 1.21-1.45 samtang ang Cum Laude nga maoy labing ubos sa latin honors adunay 1.45-1.75.
PSYCHOMETRICIAN
Mapasigarbuhon nga gipahibawo ni Young nga usa ka City scholar si Gilamie Sanchez Angcay kinsa nagtungha sa University of the Philippines-Cebu City ang nahimong top 7 sa Psychometrician Licensure Examination nga gipahigayon niadtong buwan sa Oktubre.
Gawas sa P10,000 nga nadawat ni Angcay sa iyang pag- graduate isip Cum Laude sa UP-Cebu, makadawat usab siya og laing P15,000 isip cash incentive sa iyang kalampusan sa niaging examination.
Si kanhi Konsehal Alvin Dizon ang nagpasar og ordinsa nga maghatag og cash
incentives sa honor graduates samtang sila si kanhi Konsehal Hanz Abella ug Konsehal Mary Ann de los Santos ang nagpasar alang sa mo-top sa Bar, Physician ug Licensure examination.