SIKYU NANGHIMAKAK NGA NANAPAT
Gwardya sa simbahan sa Birhen sa Regla sa Poblacion, Lapu-Lapu City miklaro nga wa niya dapati ang edaran nga babaye nga iyang gipagawas sa simbahan kay nakasamok sa nagpadayong misa atol bisperas sa kapistahan. Gisalikway sa maong security guard (nagdumili sa pagpa-ila) ang migawas nga taho nga dunay video nga giulohan og “Lola gisumbag sa guard” kay wa mahitabo nga iyang gisumbag ang tiguwang.
Identity sa maong ginang wa makuha kay way nakaila kaniya diin inisyal nga nasayran nga taga-lalawigan sa Masbate.
Ang ginang gituohan nga wa sa maayong pangisip dihang nahinabi sa pari aron unta abagan nga makapauli sa ilang dapit. Sukwahi sa taho sa social media, usa ka gwardya ang nasamad human paaka sa ginang nga gihulagway nga nag-wild.
Samtang si Rev. Fr. Bernard Corpuz, kura paroko sa Nuestra Señora Virgen de Re- gla Parish, niingon nga iyang gipatawag ang guwardiya nga nalambigit.
Gikahinabi sab ni Corpuz si Fr. Bob Villanueva, pari nga nagmisa niadtong higayona, diin nahunong sa makadiyot ang pagbatbat sa homily sa dihang nisaka ang ginang sa altar.
Iyang nasayran nga nagsunodang ginang kon unsay buhaton sa pari niadtong sayo sa buntag sa Nobiyembre 20.
Si Villanueva mao ang pari nga nakita sa video nga gipost sa usa ka Facebook account bitbit pa sa iyang garb (sotana) nga nakighinabi sa maong babaye nga naghilak samtang nagyayaw.
Gipahibawo ni Corpuz nga di manindahay og kandila ang maong babaye.
Igo lang kining mitambong sa misa apan nakamugna og kasamok samtang nagpadayon ang misa hinungdan nga gipatawag sa pari ang mga guwardiya aron sa pagbadlong niini.
Sigun sa saysay ni Villanueva ngadto sa kura paroko nga nagkalipstick ang puti nga hapin sa altar sa dihang mihawok ang maong babaye susama sa gimbuhaton sa mga pari sa dili pa sugdan ang misa.
Tungod sa maong komosyon, gihunong ni Villanueva ang iyang homily samtang gihangyo sa mga guwardiya ang maong babaye nga mogawas.
Ang guwardiya nga gitago sa ngalang Johnny nagkanayon nga upat sila ka mga guard nga suway nga mipagawas sa maong babaye.
Wa una nila kini pugsa sa paggawas samtang wa pa matapos ang misa kay mosiyagit sa higayon nga ilang suwayan sa pagdala sa gawas.
Igo nahuman ang seremonyas didto na gipagawas ang babaye diin matod pa katulo ka higayon nga gipaak ang bukton sa 20 anyos nga sikyu, samtang gikuptan ang iyang mga kamot kay suway nga modapat sa mga guwardiya.
Nagduda si Corpuz nga adunay suliran sa pangisip ang maong babaye kay sigun sa asoy ni Fr. Bob kaniya nga gipangayo-an og plite kay mopa-uli nalang siya sa ilang dapit.
Sa dihang gipangutana kon pilay gikinahanglan niya nga plitehan, P1 million ang iyang buot pangayuon. /